Колумбияда 20 ёшли талаба қиз ярим марафонда иштирок этганидан сўнг вафот этди. Хулиана Авила Сауда мусобақа вақтида ҳушини йўқотиб, шифохонага олиб кетилган.

Ҳодиса 6-сентабр куни 30 мингдан ортиқ иштирокчи қатнашган Меделин марафони вақтида юз берган. Биотиббиёт муҳандислиги факультетида таҳсил олган Хулиана Авила Сауда югуриш давомида тўсатдан йиқилиб, ҳушини йўқотган.

У зудлик билан Меделин марказий шифохонасига етказилган. Шифокорлар унинг юраги тўхтаганидан кейин уч маротаба реанимация ўтказган. Бироқ талаба қиз кейинги куни вафот этган.

Маҳаллий ҳокимият вакилларига кўра, ҳозирча Хулиана Авиланинг ўлимига нима сабаб бўлгани аниқ эмас. Мазкур ҳолат сўнгги саккиз йил ичида Меделин марафонида қайд этилган тўртинчи ўлим билан якунланган ҳодиса бўлган.

Хулиана Авила Колумбия витсе-президенти ўғли Хулианнинг севгилиси бўлган. Мамлакат Президенти Абелардо де ла Эсприэля марҳумнинг яқинларига ҳамдардлик билдирган.

“Хулиана Авиланинг оиласига, витсе-президентимизга, унинг ўғли Хулианга ва барча яқинларига ушбу оғир ва кутилмаган йўқотиш муносабати билан чуқур ҳамдардлик билдираман”, дея унинг сўзлари келтирилган.