Тошкент вилоятининг Бекобод туманида 8400 доллар пора олган юрисконсульт ушланди. Бу ҳақда ДХХ матбуот хизмати хабар берди.

Маълум қилинишича, 2024 йилнинг декабрь ойида Тошкент вилоятининг Бекобод туманида фойдаланишга топширилган янги мактабгача таълим ташкилоти биноси бўйича прокуратура томонидан қурилишга оид текширув ишлари олиб борилганда, 176 млн сўмлик камомад аниқланган ва қурилишни амалга оширган МЧЖ мансабдор шахсларига нисбатан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, ҳужжатли тафтиш текшируви тайинланган.

Бундан бохабар бўлган Тошкент вилояти ҳокимлиги “Ягона буюртмачи хизмати” давлат муассасаси бош юрисконсульти ўзининг мансабдор танишлари орқали тафтиш текшируви натижаларини ижобий ҳал қилиб бериш эвазига МЧЖ раҳбаридан 8400 доллари талаб қилган.

Ўтказилган тезкор тадбирда бош юрисконсульт келишилган пул маблағини олган вақтида ушланган. Унга нисбатан Жиноят кодексининг 168-моддаси (фирибгарлик) 3-қисми “в” банди ва 28, 211-моддаси (пора бериш) 1-қисми билан жиноят иши қўзғатилиб, қамоқ эҳтиёт чораси қўлланган.

• Бекобод
• ДХХ
• Пора
• Toshkent viloyati