Орамизда дунёдаги энг бадавлат инсонлар рейтингининг юқори ўринларини банд этиб турган миллиардерлар ҳақида билмайдиган одамнинг ўзи бўлмаса керак. Илон Маск, Билл Гейтс, Бернард Арно, Уоррен Баффет... Аммо дунёдаги энг бадавлат аёллар ҳақидаги маълумотлар унчалик кўп эмас. Айнан мана шунинг учун ҳам бугун сизни улар билан таништиришга қарор қилдик.

Жоселин Винделштейн

Бу аёлни унинг пластик жарроҳликларга бўлган ўзгача муҳаббати сабабли "Мушук-аёл" деб  ҳам атайдилар. Сабаби Жоселин бир қарашда одамдан кўра кўпроқ шерга ўхшаб қолган. Миш-мишларга қараганда, у ўзининг барча пластик операциялари учун 2 миллион доллар атрофида пул сарфлаган. Жоселин бадавлат оилада дунёга келган бўлса ҳам, бойлигининг деярли барчасини собиқ эри Алик Винделштейн билан ажрашгандан сўнг қўлга киритган. Ажрим унга 2,5 миллиард доллар миқдоридаги бойликни олиб келди, бу эса ажримлар тарихдаги энг катта кўрсаткичлардан бири ҳисобланади. Айтгандай, аёл фақатгина ичимликлар ва таомларнинг ўзига ҳар йили 500 минг доллар миқдорида пул сарфлайди. Тасаввур қиляпсизми?

Каэтана Фитц-Жеймс

Каэтана нафақат Алба герцогиняси, балки Гиннес рекордлари китобига кўра, дунёдаги энг кўп унвонга эга чиққан оқсуяк ҳам бўлган. Аёл умри давомида 50 дан ортиқ фахрий унвонни қўлга киритган. Герцогиня 85 ёшида 61 ёшли Алфонсо Диасга турмушга чиқиб барчани ҳайрон қолдирган.

Фикримизча, эркакнинг исми ҳам унинг қандай одам эканлигига яққол ишора қилиб турибди. Марҳума герцогиня ҳаёти мобайнида жуда кўп хайрия ишларини амалга оширган ва шу билан ҳам машҳурликка эришган.

Сандра Ортега Мера 

Сандра Ортега Мера Испаниянинг энг бой аёли бўлибгина қолмай, Европадаги энг ёш миллиардер ҳам ҳисобланади. У айни пайтда Европанинг энг бой одами ҳисобланувчи магнат Аманси Ортеганинг меросхўр қизидир. 

Аманси Ортега Испаниянинг машҳур “Inditex” компаниясига асос солган. Сандранинг онаси 2013 йилда вафот этгандан кейин у компаниянинг 75 фоиз акцияларини қўлга киритди.

Сиз ҳам бу компания ҳақида яхши билсангиз керак, боиси у машҳур “Зара” брендига эгалик қилади.

Кэтрин Рейнер 

Кэтрин Рейнер “Cox enterprises” конгломерати раҳбари саналмиш Кок Чемберснинг қизи бўлиб, 2015 йилда отаси компания акцияларини Кэтрин, унинг акаси ва икки синглисига тақсимлаб бергач, Рейнер хоним дунёнинг энг бой аёллари рўйхатидан ўрин олди.

Кэтрин ҳам бошқа миллиардер аёллар каби хайрия ишлари билан шуғулланади, компания бошқарувига эса қизиқиши йўқ. Айни пайтда у Морган кутубхонаси ва музейининг кенгаш аъзоларидан бири, шунингдек Нью-Йорк жамоат кутубхонасининг раҳбарлар кенгаши аъзоси ҳамдир. Шунингдек, аёл жониворларни ҳимоя қилиш билан ҳам шуғулланади.

Маргарита Луи Дрейфус

ОАВ томонидан “Малика” дея ном берилган Маргарита Луи Дрейфус глобал савдо конгломерати – “Louis Dreyfus” раҳбаридир. Ушбу компания халқаро савдо, телекоммуникациялар, кўчмас мулк, қишлоқ хўжалиги, океан ҳамда денгиз кемалари, озиқ-овқат саноати ва бошқа кўплаб йўналишлар билан шуғулланади. Бир сўз билан айтганда, аёлнинг бизнеси жуда катта.

Маргарита марҳум Роберт Луи Дрейфуснинг беваси бўлиб, йирик ҳажмдаги мерос ҳам айнан ундан қолган. Бундан ташқари, аёлнинг икки нафар ўғил фарзанди бор.

Массимиллана Ландини Алеотти

Массимиллана ўз фарзандлари билан бирга "Менарини" фармацевтик компаниясига эгалик қилади. Мазкур компания онкология ва шу каби бир қатор тиббий муаммоларни ҳал қилиш билан шуғулланиб келмоқда. 2010 йилда Массимиллана солиқларни тўлашдан бош тортганликда айбдор деб топилган эди. Аммо унинг ўзи бу ҳолатга ҳеч қандай изоҳ бермаган.

Блэр Пэрри Океден

Блэр АҚШда туғилган бўлишига қарамай, айни пайтда Австралиянинг энг бадавлат инсони ҳисобланади. Аёл 1970 йилларда айнан шу ерга кўчиб келган. Блэрнинг марҳум бобоси“Cox enterprises”нинг асосчиси бўлиб, у ҳақида юқорида сўз юритган эдик. Айни пайтда конгломератни Блэрнинг холаси бошқариб боради. Блэр эса компаниянинг катта миқдордаги акцияларига эгалик қилади ва уларни мерос сифатида қўлга киритган. Австралияда у ўзининг сахийлиги ва камтарлиги билан ном қозонган. Бундан ташқари, аёл 1989 йилда болалар учун мўлжалланган китоб ҳам чиқарган.

Айрис Фонтбона

Миллиардер Алдериок Лукаснинг беваси Айрис Фонтбона Чилининг энг бадавлат инсони саналади. У ўзининг оиласи билан бирга дунёдаги энг катта мис конларидан бири –“Антофагаст”га эгалик қилади. 2015 йилда Айриснинг кон қазиш компаниясидаги акциялари ҳажми икки баробарга катталашди, шу тариқа даромад кўрсаткичлари ҳам юқорилаб кетди.

Бундан ташқари, аёл ичимликлар ва истеъмол қадоқлари билан шуғулланувчи “Клименко” компанияси раҳбари ҳамдир. Айни пайтда “Клименко” конгломерати Чилидаги энг йирик бизнес тармоғи бўлиб турибди. Унинг йиллик даромади эса 20 миллиард долларни ташкил қилади.

Жина Райнхарт

Жина Райнхарт Австралиянинг энг машҳур ва бадавлат аёлларидан саналади. У 21 ёшлик пайтларида ўз миллиардларини тоғ қазиш билан шуғулланувчи “Хенкок” компанияси раҳбари бўлмиш отасидан мерос қилиб олган.

Жина ёшлик йилларидан бошлаб ОАВни ўзининг ақлий салоҳияти билан ром этган ва тоғ-кон саноатида анчагина ишлар қилиб улгурган. 2010 йилдан бери эса Австралиянинг сиёсий ҳаётида ҳам иштирок этади, шимолий Австралиянинг ривожланиши учун ҳисса қўшиб келади.

Бундан ташқари, Жина солиқларни қисқартириш ва давлатнинг бизнесга аралашувини камайтириш учун чиқишлар қилади. Оқибатда унинг ҳаётига бир неча бор таҳдид ҳам қилишган. Шу сабабли аёл мамлакат бўйлаб зирҳланган ва ўқ ўтмайдиган машиналар ичида ҳаракатланади.

Шарлин Карвалю Хайнекен

Шарлин Карвалю Хайнекен Нидерландиянинг энг бадавлат аёллардан бири бўлиб, “Хайнекен” компаниясининг ижрочи директори ва унинг 25 фоиз акциялари эгаси саналади.

Мазкур компания пиво ичимлигини тайёрлаш бўйича дунёдаги энг катта компаниялар қаторида 3 ўринда туради. Шарлин 2002 йили отасининг ўлимидан кейин ундан 3 миллиард доллар миқдоридаги пулни мерос қилиб олган ва Нидерландия фуқаролигига эга бўлган дунёдаги энг бадавлат инсонга айланган.

Лоурен Пауэлл Жобс

Аксарият инсонлар бу аёлни шунчаки Стив Жобснинг беваси сифатида танийдилар. Зотан унинг турмуш ўртоғи дунё тараққиёти ва хайрия ишларига катта таъсир кўрсата олган. Лоурен “Emerson Collective” фонди асосчиси ва ижрочи директори ҳисобланади, мазкур фонд иши эса таълим сифатини яхшилаш, муҳожирларни ҳимоя қилиш, ижтимоий адолат ва атроф-муҳитни ҳимоя қилишдан иборатдир. Бундан ташқари, аёл “College Track” ташкилоти директорлари кенгаши таркибига ҳам киради, ушбу ташкилот эса ночор оила фарзандлариинг олий таълим муассасаларига киришлари учун кўмак беради.

Мария Франка Фиссоло

Мария Франка Фиссоло ўз миллиардларини қандолатчилик соҳаси билан шуғулланувчи отасидан мерос қилиб олган.

Айни пайтда Мария коинотдаги энг бадавлат аёллар рўйхатидаги 4 ўринда туради. Фиссоло компанияси эса қандолатчилик соҳасида катталиги бўйича Европадаги иккинчи ва дунёдаги учинчи компания бўлиб турибди. У барчамизга яхши таниш бўлган “Tic Tac”, “Mon Cheri”, “Kinder” ва “Nutella” каби маҳсулотларни ишлаб чиқаради.

Жаклин Марс

1990 йилда Жаклин Марс ўз бойлиги ва акцияларининг 33 фоизини отаси – “Марс” компанияси асосчиси Франклин Марсдан мерос қилиб олди. Биласизки, ушбу компания шоколад батончалари ишлаб чиқариш билан шуғулланади. Айни пайтда Жаклин Марс отасининг ишлари билан фаол шуғулланмайди. У бизнеснинг ўрнига рассомчилик соҳасидан кетишни афзал билган.

Бундан ташқари, у от спортига оид халқаро мусобақалар ва тадбирлар уюштириш билан шуғулланувчи “Youset” ташкилоти васийи саналади. 2013 йилда аёл рулда ухлаб қолгани сабабли қаршисидаги машина билан тўқнашиб кетган ва 6 нафар йўловчининг жабрланишига сабаб бўлганди. Уларнинг бири воқеа жойида ҳалок бўлган. Аёл ўз айбини судда ҳам тан олган ва 2500 доллар миқдорида жарима тўлаган. Бундан ташқари, машина ҳайдаш ҳуқуқидан ярим йилга маҳрум қилинган. Аммо ҳодиса юзасидан жиноят иши очилмади. Сабаби, Жаклин Марс тез орада жабрланувчиларнинг ҳар бирига молиявий ёрдам кўрсатган экан.

Элис Уолтон

Элис Уолтон машҳур “Walmart” супермаркетлар тармоғининг меросхўри ҳисобланади. Агар 2015 йили “Walmart” корпорацияси акциялар биржасида ўзининг 7 миллиардлик пулидан ажралмаганда Элис хоним коинотнинг энг бадавлат аёлига айланган ҳам бўларди. Шундоқ ҳам Элис Уолтон ҳаётида қарама-қарши тушунчалар етарлича. Айримлар уни компания ходимларига ҳаддан ташқари кам маош беришда айбласа, айримлар тақиқланган моддалар таъсири остида автомобиль ҳайдаб кўпчиликка зарар етказганини сўзлайди.

Ушбу ҳодисаларнинг қаерда ва ким билан содир бўлгани маълум эмас, сабаби Уолтонлар империясининг вориси ҳамиша сувдан қуруқ чиқиб кета олган.

Лилиан Бетанкур

Бу аёлнинг бойлиги қанчалар кўп эканлигини тасаввур қилишингиз учун ажойиб мисол: у ҳаётининг 104 йили давомида кунига бир миллион доллардан пул сарфлаши мумкин. Аёл Франциянинг улкан компанияларидан бири – “Loreal” косметик воситалар ишлаб чиқариш тармоғининг йирик акционери ҳисобланади.

Ушбу компанияга 1909 йилда унинг отаси Эжен Шуллер томонидан асос солинган. Аёл ёшлик пайтида отасининг ёнида юриб тажриба оширган, корхонада 15 йил ишлаган. Оқибатда отасидан уни мерос қилиб олган ва асосий акционерга айланган. 2011 йилда аёл руҳий саломатлиги ёмонлашгани учун оила аъзоларининг васийлигига топширилди. Лилиан Беттанкур 2017 йилнинг 21 сентябрь куни вафот этди.

• Аёллар
• миллиардерлар
• қизиқарли
• рейтинг