АҚШ давлат котиби Энтони Блинкен биринчи Халқаро исломофобияга қарши кураш кунида Қўшма Штатлар одамларнинг ўз виждонига кўра яшаш ҳуқуқини ҳимоя қилишда давом этишини айтди.

Ўтган йили Бирлашган Миллатлар Ташкилоти 15 мартни Халқаро исломофобияга қарши кураш куни деб эълон қилган эди. Шунингдек, кеча, 15 март куни Янги Зеландиянинг Крайстчерч шаҳридаги иккита масжидга қилинган ҳужумларга тўрт йил тўлди. Ўша куни отишма оқибатида икки масжидда 51 мусулмон намозхон ўлдирилган, яна 40 нафари яраланган.

“Бу куни биз бутун дунё бўйлаб ўзини мусулмон деб кўрсатгани, амал қилгани ёки Исломни қабул қилгани ёки мусулмон сифатида қабул қилингани учун таъқибга учраган, ҳибсга олинган, қамоққа олинган ёки ҳатто ўлдирилаётган одамларга эътибор қаратамиз", – дейилади Блинкеннинг Давлат департаменти томонидан эълон қилинган баёнотида.

Блинкеннинг таъкидлашича, Қўшма Штатлар одамларнинг ўз виждони амрига кўра яшаш ҳуқуқини ҳимоя қилишда давом этади ва уни инкор этганлар номидан гапиради.

"Ҳар ким қаерда бўлишидан қатъи назар, фикрлаш, виждон, дин ва эътиқод эркинлиги, шу жумладан ўз эътиқодини ўзгартириш ёки (Худога) ишонмаслик эркинлиги ҳуқуқига эга” – дейди у.

АҚШ давлат котиби барчани Ислом динига нисбатан нафратга қарши курашишга чақирди.

“Дунё бўйлаб мусулмонлар муқаддас Рамазон ойига, рўза тутиш ва жамиятларга ғамхўрлик қилиш вақтига тайёргарлик кўраётган экан, келинг, бу ерда АҚШ ва хорижда бу нафратга қарши курашайлик”, деди у.

• Entoni Blinken
• Ислом
• Кураш