Кеча, 7 ноябрь куни ижтимоий тармоқларда Фаластин президенти Маҳмуд Аббосга суиқасд уюштирилгани акс этган видео тарқалди. Хабар қилинишича, ҳужум пайтида Аббоснинг тансоқчиларидан бири отиб ташланган. Бироқ Фаластинга яқин манбалар президентга суиқасд бўлганини инкор этди. Ҳозирча суиқасд ҳақида расмий тасдиқлар йўқ. Яқин Шарқдаги кескинлик кучайиб бораётган бир пайтда, Фаластин президенти Маҳмуд Аббосга суиқасд минтақани янги можаро гирдобига олиб келади.

Фаластин президентига қарши “Абу Жандал ўғиллари” номи остидаги янги ҳаракат аъзолари томонидан ультиматум қўйилгани айтилмоқда.
Бу ультиматумни суиқасдга алоқаси бўлиши мумкинми? Фаластинда ички бўлиниш ва қўзғолонлар кўтарилиш хавфи мавжудми?

“Абу Жандал ўғиллари” кимлар ва улар нима исташмоқда?

Ушбу ҳаракат аъзолари ўзларининг биринчи баёнотларини 5 ноябрь куни Ғарбий соҳилдаги қароргоҳида берган. Берилган баёнотларида Исроил ҳужумларига қарши аниқ позицияни ишлаб чиқиш учун раҳбариятга 24 соат вақт ажратган.
Гуруҳ ўзини “Раҳбар Абу Жандал ўғиллари”, деб атаган. Уларнинг таркибий қисми Фаластин маъмуриятининг босиб олинган Ғарбий соҳилдаги турли хавфсизлик бўлинмалари аъзоси эканлиги айтилмоқда.

Агар Фаластин раҳбарияти Исроил ҳужумларига аниқ қарама-қарши позиция ишлаб чиқмаса, қўзғолон кўтарилишини маълум қилишган.
Гуруҳ аъзолари ўзларининг қисқа баёнотларида Исроилнинг ҳужумларига жимгина сабр қилишганини, ожизлик кўрсатиб ёрдам кутишгани, лекин энди ёш болалар ва аёлларнинг ўлимига жим чидаб тура олишмаслигини билдирган.
“Биз бугундан бошлаб Фаластин раҳбарияти жиноятчи (Исроил) ишғолига қарши тўлиқ қарама-қаршилик эълон қилиш учун тарихий масъулият олдида турганини эълон қиламиз”, деб баёнотда аниқ кайфият кўрсатиб ўтишган.

Шунингдек, улар бомбардимонга қарши барча воситаларни қўллашни, Блинкеннинг баёнотларини қоралашни, АҚШнинг ҳеч қандай бўлинмаси киритилмаслигини талаб қилишган. Гуруҳ ўзини “Фаластин хавфсизлик бўлинмаларининг аъзолари”, деб таърифлаган.

Абу Жандал ким?

Гуруҳ 2002 йил апрель ойида Женин қочқинлар лагерини ҳимоя қилиш учун кураш олиб борган зобит Юсуф Аҳмад Райҳон шарафига ўзини “Абу Жандал ўғиллари”, деб атайди.
Райҳоннинг номи Абу Жандал бўлиб, Женин жангида Маҳмуд Тавалбеҳ билан бирга раҳбарлик қилишган. 2002 йили Иккинчи Интифада пайтида Женин қочқинлар лагерига Исроил томонидан бостириб кириши натижасида юзлаб фаластинликлар ҳалок бўлган ва яраланган. Айнан шу зобит шарафига улар гуруҳни “Абу Жандал ўғиллари”, деб номлашган.

• Фаластин
• Isroil
• Президент
• Суицид