Халқаро Олимпия қўмитаси (ХОҚ) Индонезиянинг бу йил Жакартада ўтказиладиган спорт гимнастикаси бўйича жаҳон чемпионатида иштирок этиши керак бўлган исроиллик спортчиларга виза бермаслик қарорини танқид қилиб, баёнот эълон қилди.

“ХОҚнинг принципиал позицияси жуда аниқ: бунга ҳақли бўлган барча спортчилар, жамоалар ва спорт мансабдор шахслари Олимпия хартияси ҳамда Олимпия ҳаракатини бошқарадиган камситмаслик, мустақиллик ва сиёсий бетарафликнинг асосий тамойилларига мувофиқ мезбон мамлакат томонидан ҳеч қандай камситишсиз халқаро спорт мусобақалари ва тадбирларида иштирок этиш имкониятига эга бўлиши шарт”, – дейилади баёнотда.

Маълум бўлишича, Индонезия ҳукумати ўт очишни тўхтатиш тўғрисидаги келишув тасдиқланган бўлишига қарамай, Исроилнинг Ғазо секторидаги ҳарбий операцияси туфайли Исроил терма жамоасига виза беришни рад этган. Спорт арбитраж суди (CАС) Исроил гимнастика федерациясининг аризасини қабул қилмади. Федерация Халқаро гимнастика федерациясидан “Исроилнинг чемпионатда иштирок этишини кафолатлайдиган зарур чораларни кўришга мажбурлаш” ёки чемпионатни “кўчириш ёхуд бекор қилиш”ни талаб қилган эди. Суд буни “Халқаро федерация ваколатлари доирасидан ташқарида” эканлигини айтиб, рад этган.

• Indoneziya
• Isroil