Хабарингиз бор, сўнгги кунларда ижтимоий тармоқларда картошканинг нархи 12 минг сўмга етгани ҳақидаги хабарлар тарқалган эди. Шу сабаб одамларда ушбу ҳолат бўйича жуда кўп саволлар туғилмоқда. Қишлоқ хўжалиги вазирлиги жавобсиз қолаётган саволларга ойдинлк киритди.

Мазкур ҳолат юзасидан олиб борилган мониторинг натижаларига кўра, бугунги кунда Тошкент шаҳридаги “Фоод City” деҳқон бозорида 1 кг картошканинг ўртача нархи 8,5 минг сўмни ташкил этмоқда (минимал 7,5 минг сўм, максимал 9 минг сўм).

Шунингдек, барча ҳудудлардаги арзонлаштирилган савдо ярмаркаларида картошка 5-6 минг сўм нархида сотилмоқда. Тошкентнинг йирик бозорларида эса картошканинг нархи қуйидагича:

– Авиация, Қўйлиқ, Миробод, Юнусобод бозорларида – 9 000 сўм;

– Сирғали, Фарҳод, Чилонзор, Эски Жува, Қорақамиш, Аския, Олой бозорларида – 10 000 сўм.

Хўш, нарх ошишига сабаб нима?

Картошканинг қимматлашишига бир қатор омиллар сабаб бўлмоқда. Масалан, такрорий экилган майдонлардан етарли ҳосил олинмади. Картошка йилига икки марта экилади:

– Январь-март ойларида экилган картошка – апрель-июлгача ҳосил беради;

– Июнь-июлда экилган картошка – ноябрь-апрель ойларида истеъмол қилинади.

2024 йил ҳосили учун такрорий майдондан 1 миллион тонна картошка етиштирилган, аммо ноябрь-апрель даврида 1,7 млн тонна зарур. Йиғилган ҳосил талабнинг фақат 44 фоизини қоплайди.

Шунингдек, такрорий экиш учун уруғлик, ўғит, ёқилғи ва бошқа ресурслар қимматлашган. Маълумот ўрнида, 1 гектар картошка экиш учун 55-60 млн сўм сарфланмоқда, бу бошқа экинларга нисбатан 2-2,5 баробар кўп.

Ишлаб чиқариш таннархи

– Охирги 4 йилда картошка нархи 173 фоизга ошган.

– Азотли ўғит 173 фоиз, калийли ўғит 175 фоиз, кимёвий воситалар 202 фоиз, дизель ёқилғиси 178 фоиз, механизация хизматлари 170 фоиз, электр энергияси 180 фоиз қимматлашган.

– Ўтган йилдан бошлаб сув солиқлари ва ҚҚС (қўшилган қиймат солиғи) ҳам қўшилгани картошка таннархига таъсир қилмоқда.

Қишлоқ хўжалиги вазирлиги айтишича, картошка нархи барқарорлаштирилиши учун қуйидаги ишлар амалга оширилган:

– 245,6 минг тонна картошка захирага олинди;

– 9,9 минг тонна маҳсулот бозорларга чиқарилди. Ҳозирда картошкалар арзонлаштирилган ярмаркаларда 4000-4500 сўмдан сотилмоқда.

Картошка нархи қачон тушади?

2025 йил ҳосили учун 122 минг гектар майдонга картошка экилиши кўзда тутилган. Шунингдек, апрель-май ойларида янги ҳосил бозорга чиқарилади ва бунинг натижасида картошка нархи пасайишига эришилади.

Амалга оширилаётган саъй-ҳаракатлар натижасида февраль-март ойларида нархлар барқарорлашиши, апрель-май ойларида эса пасайиши кутилмоқда.

• kartoshka
• қишлоқ_хўжалиги