Бугун футбол оламининг эътибори Манчестер шаҳрига қаратилган. Англия Премер Лигаси (АПЛ)нинг 32-тури доирасида, тарихий “Олд Траффорд” стадионида, ашаддий рақиблар — “Манчестер Юнайтед” ва “Манчестер Сити” жамоалари ўзаро тўқнаш келади. Ўйин Тошкент вақти билан 20:30 да бошланади.

Ўйин аҳамияти

“Манчестер Сити” чемпионлик учун курашидан аллақачон чиқиб бўлган, эндиликда жамоа мавсум якунида кучли тўртликда қолиш ва 2025/26 йилги ЕЧЛ йўлланмаси учун курашмоқда, бу эса Гвардиола жамоаси бугунги ўйинда фақат 3 очко учун майдонга тушишини англатади.

“Манчестер Юнайтед” эса ушбу мавсумда анча ёмон кўрсатгичларга эга, жамоа айни дам АПЛ турнир жадвалида 13-поғонада бормоқда, ЕЧЛ зонаси энди деярли қўл етмайдиган масофада. Бугунги дерби “Қизил иблислар” учун мавсумдаги яна бир муҳим синовлардан бири бўлади.

Бугунги баҳсда “Шаҳарликлар” сафида ўзбекистонлик ҳимоячи Абдуқодир Ҳусанов ҳам асосий таркибда майдонга тушиши тахмин қилинмоқда, сабаби Англия чемпионатининг ўтган тури Пеп Ҳусановни учрашув қайдномасига ҳам киритмаган эди. Бунинг сабаби ўлароқ футболчига “катта” ўйиндан аввал бироз дам берилгани айтилди.

Маълумот учун, Манчестер дербиси доирасида умумий 185 учрашув бўлиб ўтган. “Ман Юнайтед” 75 маротаба, “Ман Сити” эса 59 бор ғалаба қозонган ва яна 51 та баҳсда кучлар тенг келган.

Энг йирик ҳисоб: “Ман Юнайтед” 6-1 “Ман Сити” (2011) “Олд Траффорд”да.

• Abduqodir Husanov
• Футбол
• Manchester Siti
• Manchester Yunayted