Жиззах вилоятида 10 ёшли қизга нисбатан жинсий зўравонлик содир этилгани юзасидан жиноят иши қўзғатилган. Иш бўйича айбланувчи Р.А. қидирувга берилганидан бир кун ўтиб, ўзи яшаган хонадонда ўлик ҳолда топилган. Бу ҳақда Бош прокуратура матбуот котиби Ҳаёт Шамсутдинов маълум қилди.

Унинг билдиришича, жорий йилнинг 2 октябрь куни жабрланувчи боланинг онаси аризаси асосида Жиноят кодексининг 119-моддаси 4-қисми билан жиноят иши қўзғатилган. 3 октябрь куни суд ажримига асосан Р.А.га нисбатан сиртдан қамоққа олиш тарзидаги эҳтиёт чораси қўлланилиб, у қидирувга эълон қилинган.

Тергов ва тезкор-қидирув тадбирлари давомида Р.А.нинг мурдаси 4 октябрь куни ўзи яшаган хонадонда арқонга осилган ҳолда топилган. Ҳозирда ҳолат юзасидан тергов ҳаракатлари давом эттирилмоқда.

Бу ҳолат Наманган вилоятида 5 ёшли тарбияланувчига нисбатан жинсий зўравонлик содир этилгани ҳақидаги иш ортидан болаларни зўравонликдан ҳимоя қилиш масаласига эътибор кучайган бир пайтда юз берди. Мазкур иш бўйича гумонланувчи К.М. ушланган ва унга нисбатан қамоқ эҳтиёт чораси қўлланган.

Шунингдек, болаларга нисбатан жинсий зўравонлик учун жавобгарликни кучайтиришга қаратилган қонун ҳужжатлари маъқулланган. Унга кўра, 14 ёшга тўлмаган болаларга нисбатан айрим жинсий жиноятлар учун 25 йилгача ёки умрбод озодликдан маҳрум қилиш жазоси белгиланиши назарда тутилган.