Туркия ташқи ишлар вазири Мевлут Чавушўғли НАТОда Украинадаги можарони тартибга солишни истамайдиган давлатлар борлигини маълум қилди. Бу ҳақда у “Haber Global” телеканалига берган интервюсида айтди.

Унинг сўзларига кўра, гап нафақат АҚШ, балки алянсга аъзо бошқа қатор давлатлар ҳақида ҳам кетмоқда.

“Ғарбда урушни давом эттирмоқчи бўлган давлатлар бор, улар орасида НАТОга аъзо давлатлар ҳам бор. Мен нафақат Қўшма Штатларни, балки НАТОга аъзо давлатларни ҳам назарда тутяпман”,— дейди Туркия ТИВ раҳбари.

Шунингдек, унинг қўшимча қилишича, баъзи Европа давлатлари ҳам Украина портларидан ғалла экспорти бўйича озиқ-овқат битимини бузмоқчи.

“Ғалла савдосига путур етказмоқчи бўлганлар ҳам бор эди. Бу АҚШ эмас. АҚШнинг ҳиссаси қуйидагича бўлди: масалан, Россия ўғитлари учун экспорт тўсиқларини олиб ташлаш, портларга киришга рухсат бериш, банк операцияларини амалга оширди. Аммо Европада бу жараённи тўхтатиб қўйишни истайдиган давлатлар ҳам бўлди. Биз умидимизни йўқотмаймиз ва саъй-ҳаракатларимизни давом эттирамиз”,— дейди Чавушўғли.

• Mavlud Chavusho‘g‘li
• НАТО
• Украина