Зўрлаш жиноятини содир этгани учун Интерпол орқали халқаро қидирувда бўлган фуқаро Полшадан Ўзбекистонга экстрадиция қилинди.

У Полша ҳудудида қўлга олингач ва зарур тартиб талаблари амалга оширилгач, кейинчалик жиноий жавобгарликка тортиш мақсадида Интерполнинг Ўзбекистон Республикасидаги Миллий Марказий Бюроси ходимларига топширилди.

Шу билан бирга, турли оммавий ахборот воситаларида хабар қилинганидек, Америка Қўшма Штатларидан Ўзбекистон Республикасига ноқонуний миграцияга қарши курашиш тадбирлари доирасида мамлакатда ноқонуний равишда бўлган 39 нафар фуқаро депортация қилинди. Улар орасида Интерпол каналлари орқали ўта йирик миқдордаги фирибгарлик учун қидирувда бўлган жиноятчи ҳам бор эди.

Бу АҚШнинг Ўзбекистондаги элчихонаси ва Интерполнинг Ўзбекистон Республикасидаги Миллий марказий бюроси ўртасида доимий ахборот алмашинуви ва яқин ҳамкорлик асосида АҚШ иммиграция хизматлари эътиборига тушган халқаро қидирувдаги жиноятчиларнинг қўлга олинганининг иккинчи ижобий мисолидир.

Жиноятчилар Ислом Каримов номидаги Тошкент халқаро аэропортига етиб келгач, ҳуқуқни муҳофаза қилувчи органларга етказиш ва содир этилган жиноятлар учун жавобгарликка тортиш учун Интерпол Миллий марказий бюроси ва Республика Ички ишлар органлари ходимлари томонидан кутиб олинди.

Бу фактлар Интерпол доирасида унинг ўзаро ҳамкорлик механизмларидан фойдаланган ҳолда хорижий ҳамкорлар билан самарали халқаро ҳамкорликнинг яна бир намунаси бўлди.

• Депортация
• Интерпол
• Жиноят
• Полша