Халқаро олимлар жамоаси Сатурннинг йўлдошларидан бири Энселадда ҳаёт эҳтимоли борлиги ҳақидаги фараз фойдасига янги далилларни топди. Хитой университети геокимёгари Хао Жихуа бошчилигидаги тадқиқотчилар Энселаднинг муз билан қопланган океанида биологик ҳаёт учун муҳим элемент бўлган эриган фосфор бўлиши мумкинлигини тахмин қилишди.

Фосфор инсон ва ҳайвонларда суяклар, ҳужайра мембраналари ва ДНКнинг муҳим таркибий қисмидир. Илгари олимлар сунъий йўлдошда водород, азот, кислород ва олтингугурт - ҳаётнинг пайдо бўлиши учун муҳим элементларни топдилар. Аммо фосфор етишмаслиги туфайли Энселад яшашга яроқсиз ҳисобланган.

“Сайёрадаги океан суви жуда ишқорий ва кислороддан маҳрум бўлиб чиқди, худди одамлар Ерда ичадиган газланган сувга ўхшайди”, — дея агентлик сўзларини келтирган Хао Жихуа. Унинг сўзларига кўра, бундай “содали” муҳитда тоғ жинсларидаги фосфорнинг океанда эриши учун тахминан 100 минг йил керак бўлади.

Хао Жихуа Энселадда океан 100 миллион йилдан кўпроқ вақт давомида мавжуд бўлиши мумкинлигини таъкидлади. Буни инобатга олган ҳолда, олимлар шу вақт ичида океанга сезиларли миқдорда фосфор чиқариши мумкинлигини тахмин қилишди.

• Hayot tarzi
• Коинот
• илм-фан
• қизиқарли