Бугун, 21 февраль куни соат 05:09 да Тошкент шаҳрининг Учтепа туманида жойлашган Изза қурилиш бозори ҳудудида эшик ва ром маҳсулотлари ёнаётгани тўғрисида хабар келиб тушган.

Маълум қилинишича, қутқарув экипажлари воқеа жойига соат 05:17 да етиб бориб, ёнғинни соат 05:38 да қуршаб олган ва соат 06:00 да тўлиқ бартараф этган. Бу ҳақда пойтахт ФВБ ахборот хизмати хабар берди.

Ёнғин оқибатида тан жароҳати олганлар ҳақида маълумот келиб тушмаган. Ҳозирда ёнғин сабаби ҳамда етказилган моддий зарар миқдори аниқланмоқда.

Ёнғин ўчириш ишларини назорат қилиш мақсадида Ўзбекистон Фавқулодда вазиятлар вазирлиги раҳбари А. Икрамов воқеа жойига етиб бориб, вазиятни шахсан назоратга олган.

Дастлабки маълумотларга кўра, ёнғин натижасида бозор ҳудудидаги 200 квадрат метр майдонда жойлашган ром ва эшик маҳсулотлари ёниб зарарланган. Қутқарувчиларнинг тезкор ҳаракати туфайли бозорнинг 2000 квадрат метр майдони сақлаб қолинган.

Шунингдек, жорий йилнинг 16 февраль куни мазкур бозор Давлат ёнғин назорати органи томонидан текширувдан ўтказилган. Текширув давомида ёнғин хавфсизлиги қоидаларига оид бир қатор камчиликлар аниқланиб, улар бартараф этилгунга қадар бозор фаолияти вақтинча тўхтатилган ҳамда 3 кун муддатга электр таъминотидан узилган.

“Бозор маъмурияти аниқланган камчиликларни бартараф этиш бўйича кафолат хати тақдим этган. Бироқ, афсуски, ушбу қоидабузарликлар ўз вақтида тўлиқ бартараф этилмагани оқибатида ёнғин келиб чиққан”, – дейилади хабарда.

• Бозор
• ФВБ
• Тошкент
• ёнғин