1 март кунидан бошлаб Россия Украинага ҳужумни кучайтирди. Шу куни эрта тонгда, рус атреллерияси Харьков, Киев, Ахтирка, Херсон ва Горловка шаҳарларини нишонга олди.

Маълумотларга кўра, эрта тонгда рус ҳарбийлари "Град" ракета тизими орқали Харьковда давлат маъмурияти биносини ўққа тутган. Украина фавқулодда вазиятлар давлат хизмати Харков вилояти маъмурияти биносининг ўққа тутилиши оқибатида, олти киши ва бир бола жароҳатланганини таъкидламоқда. Бундан ташқари, ўша куни Василов шаҳрига ҳам ракета ҳужуми уюштирилган. Шаҳар мэри Наталя Баласиновичнинг баёнотига кўра, икки нафар киши ҳалок бўлган, уч киши жароҳатланган

Россия тезроқ Украинани таслим этиш учун ҳужум салоҳиятини оширган бўлиши мумкин. Сабаби, Киевга шимоли-ғарбдан Россия ҳарбий техникасининг кўп километрлик колоннаси яқинлашаётгани ҳақида маълумотлар тарқалди. Бундан кўринадики, Россия катта куч билан Киев ва бошқа шаҳарларни штурм қилмоқчи.

Туш вақтида, рус ҳарбийлари Украинанинг Суми вилояти жанубидаги Ахтирка шаҳри марказидаги ҳарбий қисмга артиллерия ҳужуми уюштирди. Маълумотларга кўра, бунинг оқибатида 70 нафар украиналик аскар ҳалок бўлган.

Кечки соат 16:00 чамаси, журналист Алёна Панина "Украина 24" телеканали эфирида, Херсон шаҳри рус ҳарбийлари томонидан қуршаб олинганини, улар чиқиш жойларида назорат пунктлари ўрнатганини таъкидлади.

Кечга яқин, Россия украиналикларни ахборот олишдан чеклаш мақсадида Киев телеминорасига икки маротаба ҳужум қилди. Украина Фавқулодда вазиятлар давлат хизматининг маълумот беришича, ҳужум оқибатида беш киши ҳалок бўлган, беш киши яраланган.

Тунда рус оғир артиллерияси Харьковни ўққа тутди. Россия ҳаво кучлари Житомирга ҳужум уюштириб, ўнлаб уйларни вайронага айлантирди. Ҳужум оқибатида икки киши ҳалок бўлгани, уч киши эса яралангани айтилмоқда.

• Kiyev
• Россия
• Украина
• hujum
• vayronagarchilik