Buyuk Britaniya hukumati bolalarni raqamli muhitning salbiy ta’siridan himoya qilish maqsadida 16 yoshgacha bo‘lgan shaxslarning ijtimoiy tarmoqlardan foydalanishini qonun yo‘li bilan cheklashni rejalashtirmoqda. Mamlakat rasmiylariga ko‘ra, tegishli qonun loyihasini 2026-yil 25-dekabrga qadar qabul qilish, yangi tartibni esa 2027-yil bahoridan amalga kiritish ko‘zda tutilgan.

Bosh vazir Kir Starmer ushbu tashabbusni izohlar ekan, ijtimoiy tarmoqlarning bolalar ruhiyati va psixik salomatligiga ta’siri jiddiy xavotir uyg‘otayotganini ta’kidladi. Uning so‘zlariga ko‘ra, hukumatning maqsadi yosh avlodga sog‘lom va xavfsiz bolalik muhitini ta’minlashdan iborat.

Taklif etilayotgan cheklovlar orasida Snapchat, TikTok, YouTube, X (Twitter), Instagram va Facebook kabi ommabop platformalar ham bor. Agar qonun qabul qilinsa, ushbu xizmatlar 16 yoshga to‘lmagan foydalanuvchilar uchun qo‘shimcha cheklovlar joriy qilishi talab etiladi.Mutaxassislar fikricha, bu kabi choralar bolalarning internet xavfsizligini ta’minlash, kiberbulling, zararli kontent va ijtimoiy tarmoqlarga qaramlik kabi muammolarning oldini olishga xizmat qilishi mumkin. Avvalroq Avstraliya ham 16 yoshgacha bo‘lganlar uchun shunga o‘xshash cheklovlarni joriy etgan edi.