AQSh 28-noyabr kuni Afg‘oniston fuqarolariga viza berishni to‘xtatdi. Bu haqda Kabul Now nashri xabar berdi.

Ma’lum qilinishicha, cheklanishga Vashingtonda Oq uy yaqinida afg‘onistonlik shaxs sodir etgan otishma sabab bo‘lgan.

“Afg‘oniston pasporti egalariga viza berish zudlik bilan to‘xtatildi. Qo‘shma Shtatlar milliy hamda jamoat xavfsizligini himoya qilish uchun barcha zarur choralar ko‘rilmoqda”, – deyiladi AQSh Davlat departamenti bayonotida.

Davlat kotibi Marko Rubio ham ushbu taqiqni tasdiqlagan va X ijtimoiy tarmog‘ida quyidagicha post qoldirgan:

“AQShning xalqi va millatini himoya qilishdan ko‘ra ustuvor vazifasi yo‘q”.

Siyosatdagi bu o‘zgarish 26-noyabr kuni Vashingtonda sodir bo‘lgan otishma ortidan yuzaga kelgan. Unda 29 yoshli afg‘onistonlik Rahmatullo Lakanval Oq uy yaqinida G‘arbiy Virjiniya Milliy gvardiyasining ikki a’zosiga qarata o‘q uzganlikda gumon qilinmoqda. Voqeadan so‘ng, harbiy Sara Bekstrom olgan jarohatlari tufayli vafot etgan, 24 yoshli Havo kuchlari shtab serjanti Endryu Vulf esa og‘ir ahvolda qolmoqda.

Lakanval Qo‘shma Shtatlarga 2021-yilda borgan. U ilgari Afg‘oniston armiyasida o‘n yil xizmat qilgan, shu jumladan Qandahorda AQSh maxsus kuchlari bilan birgalikda bir necha marta safarbarlikda qatnashgan. AQSh rasmiylariga ko‘ra, u Afg‘onistonda Markaziy razvedka boshqarmasi tomonidan tekshiruvdan o‘tkazilgan va 2025-yil boshida siyosiy boshpana olish uchun yakuniy ruxsatni olgan.

Otishmadan so‘ng, Tramp sobiq prezident Bayden ma’muriyati davrida AQShga kiritilgan Afg‘oniston fuqarolarini to‘liq tekshiruvdan o‘tkazishni buyurgan. Keyinchalik, AQSh Fuqarolik va immigratsiya xizmati Afg‘oniston immigratsiya va boshpana arizalarini ko‘rib chiqishni qachon davom ettirishi ma’lum qilinmagan holda to‘xtatganini tasdiqlagan.

 v

• AQSh
• Afg‘oniston
• Viza