Rossiyaning Amur viloyatida Tu-95 strategik bombardimonchi samolyoti o‘quv-mashg‘ulot parvozi vaqtida halokatga uchradi. Ekipajning olti nafar a’zosi halok bo‘lgan, yana bir kishi jarohatlangan. Bu haqda Rossiya Mudofaa vazirligiga tayanib, “TASS” xabar berdi.

Hodisa 29-sentyabr kuni aholi yashamaydigan hududda yuz bergan. Raketa tashuvchi samolyot o‘quv parvozini o‘q-dorilarsiz amalga oshirgan. Jarohatlangan ekipaj a’zosi tibbiyot muassasasiga olib ketilgan.

Halokat sabablarini aniqlash uchun Rossiya Aerokosmik kuchlari komissiyasi voqea joyiga yuborilgan. “Mash” Telegram kanali samolyot havoga ko‘tarilganidan bir necha daqiqa o‘tib qulaganini yozgan. “Baza” Telegram kanali esa halokatga samolyotdagi yoqilg‘ining portlashi sabab bo‘lgan bo‘lishi mumkinligini taxmin qilgan. Samolyot halokat joyidan qariyb 50 kilometr uzoqlikdagi “Ukrainka” aerodromiga tegishli ekani aytilmoqda.

Tu-95 — Sovet Ittifoqida ishlab chiqarilgan turbovintli strategik bombardimonchi-raketa tashuvchi samolyot bo‘lib, uzoq masofalarga oddiy va yadroviy qurollarni tashishga mo‘ljallangan. Avvalroq, 15-iyun kuni Irkutsk viloyatida Rossiyaning Tu-22M3 samolyoti ham o‘quv-mashg‘ulot parvozi vaqtida halokatga uchragan edi. O‘sha hodisada ekipaj a’zolari katapulta qilishga muvaffaq bo‘lgan.