Qonun loyihasi “Adolat” SDP fraksiyasi tashabbusi bilan kiritilgan. Uni ikkinchi o‘qishga tayyorlash jarayonida soha mutaxassislari, deputatlar va jamoatchilik vakillari ishtirokida muhokamalar o‘tkazilgan. Keng jamoatchilikdan kelib tushgan takliflarning asoslanganlari hujjatni takomillashtirishda inobatga olingan.

Loyihada bolaning o‘limiga sabab bo‘lgan qasddan sodir etilgan jinoyatlar bo‘yicha shartli hukm chiqarish va muddatidan ilgari shartli ozod qilishga oid ayrim normalarni qo‘llashni cheklash taklif etilmoqda. Voyaga yetmaganlarga nisbatan qasddan badanga og‘ir yoki o‘rtacha og‘ir shikast yetkazish ham og‘irlashtiruvchi holat sifatida belgilanmoqda.

Shuningdek, jinsiy zo‘ravonlikka uchragan voyaga yetmaganlarga davlat hisobidan yuridik yordam ko‘rsatish tartibi aniqlashtiriladi. Voyaga yetmagan guvohlarni so‘roq qilish jarayonini videoyozuv orqali qayd etish majburiyligi belgilanib, vasiylik va homiylik organi vakilining ishtirokiga oid qoidalar takomillashtirilmoqda. Bolalar o‘rtasida tarqatilishi taqiqlangan axborotdan himoya qilish hamda bolalar masalalari bo‘yicha komissiyalar qarorlarini ijro etmaslik bilan bog‘liq normalarga ham o‘zgartirishlar kiritilmoqda.