Britaniyaning BBC teleradiokompaniyasi AQSh prezidenti Donald Tramp tomonidan qo‘zg‘atilgan 10 milliard dollarlik tuhmat da’vosini bekor qilishni talab qilmoqda. Da’vo BBC’ning “Panorama” hujjatli filmi bilan bog‘liq.

RBS-Ukraina BBC’ga tayanib xabar berishicha, teleradiokompaniya Florida shtati sudi ushbu ish bo‘yicha BBC’ga nisbatan shaxsiy yurisdiksiyaga ega emasligini ma’lum qilgan. Shuningdek, sud majlisi o‘tkazilayotgan hudud noo‘rin ekani hamda Donald Tramp o‘z da’volarini yetarli darajada asoslab bera olmaganini ta’kidlagan.

BBC Tramp tomonidan hech qanday real zarar isbotlanmaganini qayd etadi. Kompaniya ma’lumotiga ko‘ra, hujjatli film namoyish etilganidan keyin Tramp qayta prezident etib saylangan va Florida shtatida saylovchilarning katta qismining ovozini qo‘lga kiritgan. Shu bilan birga, AQSh prezidenti “Panorama” filmi BritBox platformasida namoyish etilganini iddao qilgan, biroq BBC bu ma’lumotni asossiz deb atagan.

Shuningdek, BBC Tramp hujjatli film “haqiqiy yovuz niyat bilan tayyorlanganini” ishonchli tarzda isbotlay olmasligini bildirgan.

Avvalroq BBC montaj masalasida uzr so‘ragan, biroq moliyaviy kompensatsiya talablarini qat’iyan rad etgan hamda tuhmat ayblovlari uchun asoslar mavjud emasligini bildirgan. Kompaniya, shuningdek, “Panorama” filmi AQSh hududida namoyish etilmaganini va Tramp sha’niga tuhmat qilinmaganini ta’kidlagan.

Ma’lumot uchiun, 2025-yil dekabr oyida Donald Tramp BBC’ni 2024-yilgi prezidentlik saylovlaridan bir hafta oldin namoyish etilgan “Panorama” hujjatli filmi orqali tuhmat qilganlikda ayblab, sudga da’vo arizasi kiritgandi.

• Sud
• Telekanal
• Tramp