Qozog‘iston Markaziy Osiyoda birinchi bo‘lib sun’iy yog‘ingarchilik texnologiyalarini amaliyotda qo‘llashni boshladi. Turkiston shahrida loyihaning rasmiy ochilish marosimi bo‘lib o‘tdi.

Ma’lum qilinishicha, loyiha suv omborlarini to‘ldirish va mamlakat janubidagi qishloq xo‘jaligi hududlarini suv bilan ta’minlashga qaratilgan. Texnologiya Turkiston viloyatidagi 911 ming gektardan ortiq ekin maydonlarida qurg‘oqchilik va suv tanqisligi oqibatlarini kamaytirishi kutilmoqda.

Loyiha xalqaro ekspertlar hamkorligida amalga oshirilmoqda. Mutaxassislar sun’iy yog‘ingarchilik texnologiyasi yordamida yomg‘ir miqdorini 10–20 foizgacha oshirish mumkinligini aytmoqda.

Tadbirda Qozog‘iston rasmiylari, BMTning Jahon meteorologiya tashkiloti vakillari hamda BAA delegatsiyasi ishtirok etdi.