Chexiya Kiyevni artilleriya oʻqlari bilan ta’minlash to‘g‘risidagi qaroridan soʻng, mamlakat hukumati Ukrainaga qurol yetkazib berishni davom ettiradi. Bu haqda Chexiya tashqi ishlar vaziri Yan Lipavskiy ma’lum qildi.

Qayd etilishicha, fevral oyi boshida Chexiya Vazirlar Mahkamasi Ukrainaga sovgʻa sifatida qiymati 37 million kron (taxminan 1,7 mln. dollar) boʻlgan 152 millimetr kalibrli 4000 ta artilleriya snaryadlarini ajratishga qaror qildi.

“Bu qanday shaklda boʻlishini hozircha bilmayman, ammo hukumatimiz Ukrainaga inqirozni yengib oʻtishda yordam berish uchun siyosiy irodaga ega. Bu sa’y-harakatlarning bir qismi Putin uchun “yoʻqotishlar hisobini” oʻzgartirishdir. Shu sababdan u Ukrainaga jismonan hujum qilmaslikka qaror qiladi. Biz AQSh, Buyuk Britaniya, Polsha va Boltiqboʻyi mamlakatlari bilan birgamiz”, – deydi Lipavskiy “Yevropa haqiqati” gazetasiga bergan intervyusida.

Uning soʻzlariga koʻra, Chexiyada Ukrainaga snaryadlar berish-bermaslik haqida hech qanday munozaralar boʻlmagan. 

Lipavskiyning tushuntirishicha, bu voqealar Markaziy Yevropaga ham ta’sir qiladi. Migratsiya va iqtisodiy oʻzaro aloqalar oʻzgarayotgani uchun Ukraina va Rossiya atrofidagi mojarolar Chexiya uchun ham muhim.

Eslatib o‘tish mumkin, Ukraina yaqinidagi bir necha hududlarga Rossiya o‘zining yangi harbiy qo‘shinlarini joylashtirgan. Yevropa davlatlari inqirozni oldini olishga harakat qilayotgan bir vaqtda, ushbu vaziyat keskinlikni yanada oshirishi mumkin. 
 

• AQSh
• Artilleriya
• Chexiya
• Ukraina