“Demokrat.uz internet nashri rahbari Fazlidinxon Mehmonov va bloger Aziz G‘oipnazarovga nisbatan jinoyat ishi qo‘zg‘atildi”, – deya xabar bermoqda Toshkent shahri Ichki ishlar bosh boshqarmasi.

Ularga nisbatan ish Jinoyat kodeksining 165-moddasi 3-qismi “a” (Juda ko‘p miqdorda tovlamachilik) bandi bilan ochilgan.

Ma’lum qilinishicha, 2025-yilning 15-dekabr kuni gumonlanuvchi G‘oipnazarov Sergeli tumanidagi avtosalonlardan birining faoliyatini obro‘sizlantiruvchi videomaterial tayyorlab, internet tarmog‘ida joylashtirgan.

Shundan so‘ng Demokrat.uz internet nashri rahbari Mehmonov G‘oipnazarov tomonidan tayyorlangan videolavhani ijtimoiy tarmoqlardan o‘chirish hamda ushbu nashr tomonidan tayyorlangan, tadbirkorni obro‘sizlantiruvchi alohida videolavhani OAVda joylamaslik evaziga, tovlamachilik yo‘li bilan jabrlanuvchidan jami 50 ming dollari talab qilgan.

Fazlidinxon Mehmonov jabrlanuvchidan 29-yanvar kuni 3 ming dollarini olib, so‘ng, 10-fevral kuni 17 ming dollarni olayotgan vaqtida daliliy ashyolar bilan qo‘lga olingan.

Boshqarma mazkur shaxslarning harakatlaridan jabr ko‘rgan fuqarolardan ichki ishlar organlariga yoki 102 raqamiga murojaat qilishlarini so‘ragan.

Avvalroq Taftish.uz saytining besh nafar xodimi tovlamachilik va firibgarlikda gumonlanib protsessual tartibda ushlangandi.

• IIB
• Jinoyat
• Toshkent