O‘zbekistonda dual ta’limni rivojlantirish bo‘yicha yangi tizim joriy etilmoqda. 2027/2028-o‘quv yili yakunidan boshlab oliy ta’lim muassasalari va buyurtmachi korxonalarning dual ta’limdagi samaradorligi bo‘yicha reyting yuritiladi.

Reytingda talabalarni dual ta’limga qamrab olish darajasi, ularning o‘rtacha ish haqi hamda o‘zlashtirish ko‘rsatkichlariga ustuvor ahamiyat beriladi.

Eng yuqori natija qayd etgan uchta OTM va uchta korxona reytingdagi o‘rniga qarab 1, 2 va 3 milliard so‘mdan rag‘batlantiriladi.

Shuningdek, 2027-yil 1-yanvardan boshlab muhandislik, ishlab chiqarish va ishlov berish, arxitektura-qurilish hamda qishloq xo‘jaligi yo‘nalishlarida dual ta’lim olayotgan talabalar uchun korxonalar tomonidan to‘langan ish haqi xarajatlarining 50 foizi subsidiya sifatida qoplanadi.

Korxonalarni dual ta’limga faol jalb qilish maqsadida ularga qo‘shimcha imtiyozlar ham beriladi. Jumladan, OTMlarda amaliyot bazasini tashkil etish uchun olib kiriladigan ayrim jihoz va uskunalarga 2030-yil 1-yanvargacha 1 foiz miqdorida bojxona boji stavkasi belgilanadi.

Bundan tashqari, kelasi yildan “korxona – oliygoh – maqsadli kadr” tizimi 75 ta OTMda, 2028-yildan esa barcha oliy ta’lim muassasalarida joriy etilishi ko‘zda tutilgan.

Yangi yondashuvda ish beruvchi korxona o‘ziga zarur mutaxassisni tayyorlash uchun OTMga buyurtma beradi. Bu esa ta’lim jarayonini mehnat bozori ehtiyojlariga yanada yaqinlashtirishga xizmat qilishi kutilmoqda.

Shuningdek, OTM bitiruvchilarining ishga joylashish ko‘rsatkichlarini baholash uchun “Bitiruvchi sifati indeksi” joriy etiladi. Bitiruvchilari bandligi bo‘yicha yuqori natija ko‘rsatgan 20 ta OTMga 500 million so‘mdan ajratiladi.

Umuman, yangi tizimda dual ta’lim samaradorligi nafaqat talabalar soni, balki ularning bilim darajasi, daromadi va kelgusidagi bandligi orqali baholanadi.