Joriy yilning yanvar oyida Farg‘ona viloyati Furqat tumanidagi “Yoshlar kichik sanoat zonasi” hududidan mahalliy mas’uliyati cheklangan jamiyatga qurilish materiallari ishlab chiqarish maqsadida uzoq muddatga 22 sotix yer maydoni ijaraga berilgan.

Lekin, muqaddam sudlangan MCHJ rahbari sotish huquqi bo‘lmasa-da, ushbu yer maydonini xaridorga 52 ming AQSH dollariga sotishga kelishib hamda viloyat hokimligi huzuridagi “Kichik sanoat zonalarini boshqarish direksiyasi”da ishlovchi tanishi orqali uning nomiga xususiylashtirib berishi evaziga 15 ming AQSH dollari, jami 67 ming AQSH dollari talab qilgan.

Davlat xavfsizlik xizmati, Iqtisodiy jinoyatlarga qarshi kurashish departamenti va Ichki ishlar organlari xodimlari hamkorligida o‘tkazilgan tezkor tadbirda Farg‘ona viloyati hokimligi huzuridagi “Kichik sanoat zonalarini boshqarish direksiyasi”ning Furqat tumani bo‘yicha yetakchi mutaxassisi MCHJ rahbari bilan birga 15 ming AQSH dollarini olgan vaqtlarida ashyoviy dalillar bilan ushlandi.

Hozirda mazkur shaxslarga nisbatan Jinoyat Kodeksining 25, 168-moddasi 3-qismi “A, “V”bandlari bilan jinoyat ishi qo‘zg‘atilib, tergov harakatlari olib borilmoqda.

Davlat xavfsizlik xizmati xodimlari tomonidan Bosh prokuratura huzuridagi Departament bilan hamkorlikda o‘tkazilgan tezkor tadbirda esa Toshkent viloyati Qurilish va uy-joy kommunal xo‘jaligi bosh boshqarmasi yuriskonsulti viloyat ma’muriy sudining apellyatsiya instansiyasida ko‘rib chiqilayotgan ma’muriy ishni mansabdor tanishlari orqali Bo‘ka tumanida aholiga xizmat ko‘rsatuvchi MCHJ ta’sischisi foydasiga ijobiy hal qilib berish evaziga 15 ming AQSH dollari olgan vaqtida ashyoviy dalillar bilan ushlandi.

Holat yuzasidan yuriskonsultga nisbatan Jinoyat Kodeksining 168-moddasi 3-qismi “A” bandi va 28, 211-moddasi 2-qismi “B” bandi bilan jinoyat ishi qo‘zg‘atilib, “qamoq” ehtiyot chorasi qo‘llanildi. Bu kabi qonun buzilishi holati Surxondaryo viloyatida ham qayd etilib, unda Sho‘rchi tumani davlat soliq inspeksiyasining soliq inspektori xizmat mavqeidan foydalangan holda 1999-yilda tug‘ilgan fuqaro bilan o‘zaro til biriktirib, mahalliy tadbirkorga tegishli bo‘lgan MCHJning 19 mln. 400 ming so‘mlik soliq qarzdorligini so‘ndirib berish evaziga 8 mln. so‘m talab qilishgan.

Davlat xavfsizlik xizmati, Prokuratura va Ichki ishlar organlari xodimlari hamkorligida o‘tkazilgan tezkor tadbirda, dastlab 1999 yilda tug‘ilgan fuqaro so‘ralgan pul mablag‘ini olgan vaqtida ushlandi.

So‘ngra tezkor tadbir davom ettirilib, ushbu fuqarodan 6 mln. so‘mni uchinchi shaxs orqali olgan vaqtida soliq inspektorining noqonuniy harakatiga chek qo‘yildi.

Hozirda soliq inspektoriga nisbatan Jinoyat Kodeksining 168-moddasi 3-qismi “V” bandi va 210-moddasi 2-qismi “V” bandi bilan, uning jinoiy sherigi bo‘lgan fuqaroga esa Jinoyat Kodeksining 28,168-moddasi 3-qismi “V” bandi va 212-moddasi 3-qismi “A” bandi bilan jinoyat ishi qo‘zg‘atilib, qamoq ehtiyot chorasi qo‘llanildi.

Tergov harakatlari olib borilmoqda.

• DXX
• Jinoyat
• Korrupsiya
• Toshkent