Qirg‘iziston prezidenti Sadir Japarov g‘alaba kunini nishonlashga bag‘ishlangan tadbirlarda ishtirok etish uchun Moskvaga tashrif buyuradigan yagona xorijiy davlat rahbari bo‘ladi. Bu haqda “Vedomosti” nashri prezident ma’muriyatidagi diplomatik manbaga tayanib xabar berdi.

Qayd etilishicha, Sadir Japarov 31-mart kuni hukumatdagi xalqaro munosabatlarni nazorat qiluvchi bosh vazir o‘rinbosari Aleksey Overchukdan Rossiyaga tashrif buyurish taklifini olgan. Qirg‘iziston rahbarining rasmiy tashrifi 8-9 may kunlariga mo‘ljallangan.

“Albatta, biz Qirg‘iziston ushbu g‘alabaga va Moskvani himoya qilishga qanday hissa qo‘shganini doim eslaymiz, bu biz uchun muqaddasdir”, – dedi Overchuk tashrif haqida e’lon qilar ekan.

“Vedomosti” xabariga koʻra, tashrif davomida Qirgʻiziston prezidenti tantanali tadbirlarda va oliy darajadagi muzokaralarda ishtirok etadi. Rossiya prezidenti matbuot kotibi Dmitriy Peskov gazetaning boshqa xorijiy davlatlar rahbarlarining bayramga Moskvaga kelishi mumkinligi haqidagi so‘roviga javob bermadi.

Qirg‘izistonlik siyosatshunos va Markaziy Osiyo bo‘yicha ekspert Mars Sariyevning aytishicha, Moskva Qirg‘izistonni “Markaziy Osiyo uchun kurash” fonida “ishonchli hamkor” sifatida ko‘radi. Sarievning qayd etishicha, joriy yil 23-aprel kuni AQShning sobiq elchisi, hozirda Davlat kotibining Janubiy va Markaziy Osiyo boʻyicha yordamchisi Donald Lu Bishkekka kelishiga sabab, gʻarb rasmiylari “Markaziy Osiyo davlatlarini oʻz tomoniga tortishga harakat qilayotganidir”.

“Ammo Qirg’iziston hozir Rossiya bilan siyosiy va iqtisodiy jihatdan chambarchas bog‘langan. Moskva tanqislikni yopish uchun mamlakatga elektr energiyasi yetkazib berishga rozi bo‘ldi. Davlatlarimiz havo hujumidan mudofaa sohasida yaqindan hamkorlik qilmoqda. Qirg‘iziston Rossiyaning mintaqadagi ishonchli forpostlaridan biri, menimcha, Qirg‘iziston prezidentining Moskvaga bo‘lajak tashrifi ham shu sabab bo‘ldi”, – deydi Sariyev.

Ma’lumot uchun, 2022-yilda Ukrainada harbiy harakatlar boshlanganidan 2,5 oy o'tgach bo'lib o'tgan g'alaba kunini nishonlash uchun birorta ham xorijiy davlat rahbari Moskvaga kelmadi. Kreml bunga munosabat bildirib chet el rahbarlarini taklif qilmaganini aytgandi.

“Bu yubiley sanasi emas. Bu bizning bayramimiz, bu butun Rossiya uchun, barcha ruslar uchun muqaddas bayramdir ”, – dedi o'sha paytda Rossiya Federatsiyasi Prezidentining matbuot kotibi Dmitriy Peskov.

• 9-may
• Qirg‘iziston
• Rossiya