O‘zbekiston Respublikasi Konstitutsiyaviy sudi majlisida shaxsni ma’muriy tartibda 48 soatdan ortiq ushlab turish imkonini beruvchi norma Konstitutsiyaga muvofiqligi ko‘rib chiqildi va u Asosiy qonunga zid deb topildi.
Maktub va ma’lumotlarga ko‘ra, mazkur masala Oliy Majlisning Inson huquqlari bo‘yicha vakili (Ombudsman) murojaati asosida o‘rganib chiqilgan.
Asosiy jihatlar va o‘zgarishlar:
Ma’muriy javobgarlik to‘g‘risidagi kodeksning 288-moddasi ikkinchi qismiga muvofiq, chegara tartibini buzgan yoki shaxsini tasdiqlovchi hujjati bo‘lmagan shaxslar uch sutkagacha, prokuror sanksiyasi bilan esa o‘n sutkagacha ushlab turilishi mumkin edi.
O‘zbekiston Respublikasi Konstitutsiyasining 27-moddasida shaxs sud qarorisiz 48 soatdan ortiq ushlab turilishi qat’iyan mumkin emasligi belgilangan.
Konstitutsiyaviy sud amaldagi normalarda 48 soatdan ortiq ushlab turish zarurati tug‘ilganda sud qarorini olish mexanizmi nazarda tutilmaganiga e’tibor qaratib, tegishli normani Konstitutsiyaga muvofiq emas deb topdi.
Qarorda shaxsni 48 soatdan ortiq ushlab turish masalasida faqat prokurorni xabardor qilish yoki prokuror sanksiyasi berish sud qarorining o‘rnini bosa olmasligi alohida ta’kidlandi.
Mazkur qaror fuqarolarning erkinligi va shaxsiy daxlsizligini ta’minlash, shuningdek, huquqni muhofaza qiluvchi amaliyotda sud nazoratini kuchaytirishda muhim huquqiy qadam hisoblanadi.
31°
Kechasi 18°
