Poytaxtda qonunchilik hujjatlarini buzgani uchun ushlangan transport vositalarini vaqtincha saqlash joylariga olib kelish, joylashtirish hamda qaytarib berish jarayonlarini tartibga soluvchi yangi nizom tasdiqlandi. Adliya vazirligining ma’lum qilishicha, ushbu o‘zgarishlar haydovchilar uchun shaffoflikni ta’minlash va ortiqcha ovvoragarchiliklarning oldini olishga qaratilgan.

Yangi tartibga ko‘ra, vakolatli davlat organi tomonidan transport vositasini jarima maydonchasiga joylashtirish bo‘yicha qaror qabul qilingach, darhol “Jarima maydonchasi” maxsus moduli orqali tegishli idoralar va xizmat ko‘rsatuvchi yuridik shaxslarga xabar yuboriladi.

Eng muhim o‘zgarishlardan biri — endilikda transportni boshqarishdan chetlashtirishni nazarda tutuvchi qoidabuzarliklar sodir etilganda, avtomashinalar jarima maydonchasiga faqat maxsus texnika — evakuator yoki manipulyator yordamida olib kelinishi shart. Bu esa transport vositalarining ruxsatsiz yoki boshqa shaxslar tomonidan boshqarilib olib kelinishining oldini oladi.

Avtomashinani jarima maydonchasidan chiqarish tartibi ham raqamlashtirildi. Unga ko‘ra, transport vositasini saqlab turishga sabab bo‘lgan omillar bartaraf etilgach, uni olib chiqishga “Jarima maydonchasi” moduli orqali ruxsat beriladi. Mazkur ruxsatnoma ma’muriy ishni ko‘rib chiquvchi organ mansabdor shaxslari tomonidan rasmiylashtirilib, QR kod bilan tasdiqlanadi.

Hujjat elektron shaklda haydovchiga hamda saqlash xizmatini ko‘rsatuvchi tashkilotga bir ish kuni ichida yuboriladi, shuningdek, haydovchining mobil telefoniga tegishli SMS xabarnoma jo‘natiladi. Mas’ullarning ta’kidlashicha, ushbu modul orqali rasmiylashtirilmagan har qanday ruxsatnoma asosida avtomashinani jarima maydonchasidan chiqarish qat’iyan taqiqlanadi.