Markaziy Osiyoning beshta davlatida pensionerlarga to‘lanadigan mablag‘ miqdori sezilarli darajada farq qiladi. 2026-yilga oid keltirilgan ma’lumotlarga ko‘ra, o‘rtacha oylik pensiya Qozog‘istonda 350 dollar, Qirg‘izistonda 147 dollar, O‘zbekistonda 143 dollar, Tojikistonda 55 dollarni tashkil etadi. Turkmanistonda esa pensiya miqdori uning turiga qarab belgilanadi.

O‘zbekistonda 2026-yil 1-iyul holatiga ko‘ra, o‘rtacha oylik pensiya 1,7 million so‘m yoki taxminan 143 dollarga teng. Eng kam yoshga doir pensiya 983 ming so‘m (83 dollar), eng kam nogironlik pensiyasi esa 1 million 83 ming so‘m (91 dollar) etib belgilangan. Mamlakatda pensiya oluvchilar soni 4,35 million nafardan oshgan.

Qozog‘istonda o‘rtacha oylik pensiya 350 dollarni tashkil etadi. Mamlakatda 2,5 milliondan ortiq pensioner bor. Qirg‘izistonda esa o‘rtacha pensiya 12 898 som yoki taxminan 147 dollarga yetgan. Bu davlatda 826,5 ming nafar pensioner ro‘yxatga olingan.

Tojikistonda 2026-yil 1-sentabr holatiga ko‘ra, o‘rtacha pensiya 505,67 somoniy yoki 55 dollarni tashkil qilgan. Mamlakatda 893 mingdan ortiq pensioner bor. Turkmanistonda eng kam pensiyaning bazaviy miqdori 550 manat yoki rasmiy kurs bo‘yicha taxminan 157 dollarga teng. Ayrim toifadagi fuqarolar, jumladan, urush qatnashchilari uchun pensiya miqdori yuqoriroq.

Mintaqa mamlakatlarida pensiyaga chiqish yoshi ham turlicha. O‘zbekistonda erkaklar 60 yoshda, ayollar 55 yoshda, Qozog‘istonda esa erkaklar 63 yoshda, ayollar 61 yoshda pensiyaga chiqadi. Qirg‘iziston va Tojikistonda bu yosh erkaklar uchun 63, ayollar uchun 58 yoshni tashkil etadi. Turkmanistonda erkaklar 62, ayollar 57 yoshda pensiya olish huquqiga ega.

O‘zbekistonda pensiya tizimini isloh qilish bo‘yicha ham takliflar muhokama qilinmoqda. Ularga ko‘ra, pensiya hisobida inobatga olinadigan ish haqi davrini 2027-yildan bosqichma-bosqich 20 yilga yetkazish, minimal ish stajini 2034-yilgacha 15 yilga oshirish hamda 2028-yildan pensiya yoshini har yili uch oyga uzaytirish rejalashtirilgan. Taklif amalga oshirilsa, 2039-yilga borib pensiya yoshi erkaklar uchun 63 yosh, ayollar uchun 58 yoshga yetishi mumkin.