Moldovadan bir tomonlama tartibda mustaqillik e’lon qilgan Dnestrbo‘yi hududida 1-yanvardan Ukraina orqali Rossiya gazi tranziti to‘xtatilishi ortidan energetika inqirozi yuzaga kelgan.

Moldova hukumati Dnestrbo‘yiga yordam taklif qilgan, lekin tan olinmagan respublika amaldorlari ko‘makni rad etgan va bu vaziyat esa mahalliy aholini xavotirga solmoqda.

“Bugun biz Dnestrbo‘yida yashovchi aholining bir kunda bir necha soatgacha elektr energiyasiz qolib ketayotganini, isitish va eng muhimi, gaz ta’minoti yo‘qligini ko‘rmoqdamiz. Bugundan boshlab hatto ichimlik suvi ta’minotida uzilishlar boshlandi”, – deya ma’lum qilgan mamlakat bosh vaziri Dorin Rechan.

Kishinyov gaz bilan bog‘liq vaziyatni Rossiyaning manipulyatsiya va targ‘ibot rejasining bir qismi deb atamoqda. Bosh vazir Dorin Rechan Rossiyani mamlakatdagi vaziyatni beqarorlashtirish maqsadida mintaqada gumanitar inqirozni keltirib chiqarayotganlikda ayblagan.

Moldova hukumatining fikricha, Rossiya Dnestrbo‘yida o‘z harbiy ishtirokini kuchaytirishdan manfaatdor.

• Gaz
• Moldova
• Rossiya
• Tranzit