Yig‘ilishda Toshkent shahrini kuz-qish mavsumiga tayyorlash, kommunal va energetika infratuzilmasining barqaror ishlashini ta’minlash bo‘yicha amalga oshirilgan ishlar muhokama qilindi.

“Dolzarb 40 kunlik” doirasida shahardagi 2 ming kilometr ariq chiqindilardan tozalandi, 500 ming tup mevali va manzarali daraxt hamda gul ko‘chatlari ekildi.

Elektr ta’minotini yaxshilash maqsadida muammo kuzatilgan 114 ta mahalladagi transformatorlar yangilandi, 443 tasi ta’mirlandi. Shuningdek, 600 kilometr elektr tarmog‘i almashtirilib, 2,5 mingta yoritish ustuni soz holatga keltirildi.

Noqonuniy elektr va gaz iste’molining oldini olish hamda energiya tejamkor texnologiyalarni joriy etish natijasida bir oyda poytaxtda 11 million kilovatt-soat elektr energiyasi va 10 million kub metr tabiiy gaz tejaldi. Elektr va gaz tarmoqlaridagi yo‘qotishlar esa qariyb 1 foizga kamaytirildi.

Mutasaddilarga noqonuniy qurilmalarni aniqlash, qonun ustuvorligini ta’minlash va jazo muqarrarligi bo‘yicha ishlarni tizimli davom ettirish topshirildi.

Ta’kidlanganidek, Olmazor tumanida ko‘rib chiqilgan vazifalar poytaxtning barcha tumanlari uchun birdek dolzarb hisoblanadi.

Yig‘ilish yakunida poytaxt tumanlari hokimlari va boshqa mas’ul rahbarlarning axboroti tinglandi.