O‘zbekistonda aholiga suyultirilgan gaz yetkazib berish tizimini isloh qilish doirasida yangi kompaniya tashkil etish taklif qilindi. Bu haqda Prezident matbuot xizmati ma’lum qildi.

Unga ko‘ra, “Hududgazta’minot” ta’sischiligida LPG-Trade MCHJ tashkil etiladi. Kompaniya suyultirilgan gazni birja orqali xarid qilib, belgilangan tartibda aholiga yetkazib berish bilan shug‘ullanadi.

Yangi tizimda ijtimoiy himoyaga muhtoj oilalarni qo‘llab-quvvatlashga alohida e’tibor qaratiladi. Bunda ehtiyojmand aholiga xarid qilingan suyultirilgan gazning har bir kilogrammi uchun kompensatsiya to‘lash mexanizmi joriy etilishi ko‘zda tutilmoqda.

Shuningdek, ijtimoiy soha obyektlariga suyultirilgan gaz birja narxlarida yetkazib beriladi. Aholiga belgilangan narxda sotish natijasida yuzaga keladigan tafovut esa respublika budjeti hisobidan qoplanishi rejalashtirilgan.

Suyultirilgan gaz yetkazib berishda xususiy sektor ishtiroki ham kengaytiriladi. Dastlab Andijon viloyatida xususiy operatorlarni jalb etish bo‘yicha pilot loyiha amalga oshirilishi rejalashtirilgan. Operatorlar tegishli litsenziya va ruxsatnomalarga ega bo‘lishi, malakali mutaxassislarni jalb qilishi hamda aholiga mobil ilova va onlayn xizmatlar orqali xizmat ko‘rsatishi talab etiladi.

Bundan tashqari, iste’molchilar soni va hududiy masofadan kelib chiqib, shaharsozlik hamda yong‘in xavfsizligi talablariga javob beradigan gaz shoxobchalari tashkil etiladi. Keyinchalik ushbu tajribani boshqa hududlarda ham joriy etish ko‘zda tutilmoqda.

Prezident Shavkat Mirziyoyev mutasaddilarga suyultirilgan gaz yetkazib berish grafigini qat’iy yo‘lga qo‘yish, hisob-kitoblarni raqamlashtirish va taqsimotda shaffoflikni ta’minlash bo‘yicha topshiriqlar berdi.