O‘zbekistonda avtotransport vositalarini Piskent sinov majmuasida tekshirish amaliyoti 2025-yil 2-sentyabrdan to‘xtatiladi. Bu haqda Texnik jihatdan tartibga solish agentligi ma’lum qildi.

Mazkur amaliyot 2024-yil 1-noyabrdan joriy qilingan bo‘lib, maqsad iste’molchilar manfaatlarini himoya qilish va sifati kafolatlanmagan mashinalarning mamlakatga olib kirilishini cheklash edi. Tahlillar shuni ko‘rsatdiki, texnik reglamentga muvofiq turini ma’qullamagan yengil avtomobillar importi ularni alohida sinovdan o‘tkazish zaruratini yuzaga keltirgan.

O‘tgan yilgacha mamlakatda faqat uchta dilerlik markazi mavjud bo‘lib, ular atigi 15 ta avtomobil modeli uchun turini ma’qullash hujjatini olgan edi. Hozir esa 21 ta xorijiy kompaniyaning rasmiy dilerlari faoliyat boshlab, 100 dan ortiq avtomobil rusumlari uchun turini ma’qullash hujjatlari rasmiylashtirildi.

Natijada, aholiga sifati va xavfsizligi kafolatlangan avtomobillarni yetkazib berish tizimi shakllandi. Iste’molchilar turli rusumdagi avtomobillarni rasmiy dilerlar orqali sotib olish imkoniyatiga ega bo‘ldi.

Shu munosabat bilan Piskent avtopoligonidagi sinov amaliyotiga ehtiyoj qolmadi. Avtomobillar sifati va xavfsizligi doimiy nazorat qilinadi, talablarga zid holatlar yoki iste’molchilardan shikoyatlar kelib tushganda esa tegishli choralar ko‘riladi.

Agentlik fuqarolarga avtomobil xaridini faqat rasmiy dilerlar orqali amalga oshirishni tavsiya qilgan.

• Avto
• Toshkent viloyati