Eronning so‘nggi shohi Muhammad Rizo Pahlaviyning o‘g‘li, muxolif siyosatchi Rizo Pahlaviy mamlakatda davom etayotgan norozilik namoyishlari yangi bosqichga o‘tayotganini aytib, eronliklarga ularning yolg‘iz emasligini va yaqin vaqt ichida chetdan yordam kelishini ma’lum qildi. U bu haqda X platformasida e’lon qilingan videomurojaatida aytib o‘tdi.

“Men Islom Respublikasini ag‘darish va aziz Eronimizni qaytarib olish uchun milliy qo‘zg‘olonning yangi bosqichini e’lon qilaman. Eron ichida, shaharlarning markaziy ko‘chalarini egallab, ularni nazoratda ushlab turishdan tashqari, rejimning yolg‘on targ‘iboti va aloqa vositalarini uzib qo‘yish uchun mas’ul bo‘lgan barcha muassasa va idoralar qonuniy nishonlar hisoblanadi.

Davlat muassasalari xodimlari hamda qurolli va xavfsizlik kuchlari a’zolari oldida imkoniyat bor: xalq tomoniga o‘tib, millat bilan bir safda turish yoki xalqqa qarshi qotillar bilan hamkorlikni tanlab, o‘zlariga millatning abadiy uyati va la’natini sotib olish”, — dedi Pahlaviy o‘z murojaatida.

Bundan tashqari, ommaviy norozilik namoyishlari fonida Eronga qaytishga tayyor ekanini bildirdi va AQSh rahbariyatini “hal qiluvchi” paytda harakat qilishga chaqirdi.

“Barcha Eron elchixonalari va konsulliklari Eron xalqiga tegishlidir. Endi ularni Islom Respublikasining sharmandali bayrog‘i o‘rniga mamlakat milliy bayrog‘i bilan bezash vaqti keldi. Biz yolg‘iz emasmiz. Dunyo bo‘ylab yordam ham tez orada yetib keladi. Keyingi xabarlarimni kuting”, — dedi Eron so‘nggi shohining o‘g‘li.

• Eron
• Namoyish