Rossiya Ichki ishlar vazirligi mamlakatning ilg‘or rivojlanish hududlarida ishlaydigan xorijiy fuqarolarni rus tili, Rossiya tarixi va qonunchilik asoslari bo‘yicha bilimni tasdiqlash talabidan ozod etishni taklif qildi. Tegishli loyiha federal portalda e’lon qilindi.

Taklif investitsiyalarni jalb qilish uchun maxsus sharoitlar yaratilgan hududlarda faoliyat yurituvchi kompaniyalar va xizmat buyurtmachilarida ishlaydigan xorijliklarga taalluqli.

Rossiya Iqtisodiy rivojlanish vazirligi ma’lumotlariga ko‘ra, Uzoq Sharqda bunday 16 ta hudud, Arktika zonasida esa yana ikkita hudud mavjud.

Ichki ishlar vazirligi fikricha, ushbu talabni bekor qilish ish beruvchilarga xorijiy mutaxassislarni tezroq jalb etish imkonini beradi hamda hududlarning investitsiyaviy va ijtimoiy-iqtisodiy rivojlanishiga qulay sharoit yaratadi. Hozircha bu taklif loyiha shaklida bo‘lib, uning qabul qilingani haqida ma’lumot berilmagan.