Данияда 2027 йил августидан бошлаб ўқитувчилар дарсни бузаётган ўқувчиларни зарурат туғилганда жисмоний куч ишлатиб синфдан чиқариши мумкин бўлади. Янги тартиб мактабларда зўравонлик ва интизом муаммоларига қарши курашиш мақсадида жорий этилмоқда. Бу ҳақда The Telegraph хабар берди.

Ислоҳот ўқитувчиларга ўқувчини ушлаб туриш, бир жойда сақлаш ёки унинг розилигисиз бошқа хонага олиб ўтиш имконини беради. Бироқ жисмоний аралашув фақат истисно ҳолатларда ва вазият тақозо этганда қўлланиши керак. Бундай ҳар бир ҳолат ҳақида ота-оналар ва муниципал кенгаш хабардор қилинади.

Қонун лойиҳаси Таълим вазирлиги томонидан ўқитувчилар касаба уюшмасининг мурожаатларидан сўнг ишлаб чиқилган. Данияда жисмоний жазолаш 1967 йилда қонунан тақиқланган. Амалдаги қоидаларга кўра, ўқитувчилар фақат ўқувчи ўзига, бошқаларга ёки мактаб мулкига хавф туғдирган вазиятларда жисмоний куч ишлатиши мумкин.

Таълим вазирлиги томонидан эълон қилинган сўровнома натижаларига кўра, 2025 йилда Даниядаги синфларнинг 55 фоизида ўқувчилар ўртасида камида бир марта жисмоний зўравонлик кузатилган. Бу кўрсаткич 3-синфгача бўлган синфларда 75 фоизни, 4–6-синфларда 59 фоизни, 7–10-синфларда эса 27 фоизни ташкил этган.

Ўқитувчилар касаба уюшмаси президенти Гордон Орсков Мадсеннинг таъкидлашича, 2025 йилда ҳар уч ўқитувчидан бири салбий оқибатлардан хавотирланиб, синфдаги тартибни тиклаш учун жисмоний куч ишлатишдан тийилган. Янги тартиб 2027 йил августида кучга кириши режалаштирилган.