Qo‘shrabot tumanida ilk bor tashkil etilgan “Mayiz sayli” festivalida Samarqand viloyati hokimi vazifasini bajaruvchi Adiz Boboyev, qator vazirlik va idoralar vakillari, mahalliy va xorijiy mehmonlar, OAV va keng jamoatchilik ishtirok etdi.

Tadbir doirasida qishloq xo‘jaligi ko‘rgazmalari, mayizchilikka bag‘ishlangan anjuman va konferensiyalar tashkil etildi. Ochilish marosimida so‘zga chiqqan Adiz Boboyev Samarqand mayizining nufuzi, xalqimizning bog‘dorchilik an’analari, hosildor uzum navlarini ko‘paytirish va tokzorlarning sug‘orish tizimini yaxshilash bo‘yicha amalga oshirilayotgan ishlar haqida to‘xtalib o‘tdi.

Ma’lum qilinishicha, o‘tgan yili Samarqand viloyati bog‘bonlari 663 ming tonna uzum yetishtirgan bo‘lsa, joriy yil bu ko‘rsatkich 700 ming tonnaga yetishi kutilmoqda. Yilning birinchi yarmida esa 2 ming tonna uzum va 34,2 ming tonna mayiz mahsuloti eksport qilingan.

Hozir Qo‘shrabot tumanidagi dehqon va tomorqa xo‘jaliklari 7 ming gektardan ortiq yer maydonida uzum yetishtirmoqda. Bu tokzorlardan har yili 50–55 ming tonna hosil olinadi va uning katta qismi mayizga aylantiriladi.

“Mayiz sayli”da Adliya vaziri Akbar Toshqulov ishtirok etib, viloyat rahbari Adiz Boboyevga “Samarqand mayizi” geografik ko‘rsatkichi davlat ro‘yxatidan o‘tkazilgani haqidagi hujjatni hamda Qo‘shrabot tumani hokimiga “Qo‘shrabot mayizi” tovar belgisi rasman ro‘yxatdan o‘tgani haqidagi guvohnomani topshirdi.

Shuningdek, festivalda faol ishtirok etgan tumanlar fermer va dehqonlari, tomorqa xo‘jaliklari vakillariga viloyat hokimligi tomonidan turli nominatsiyalar bo‘yicha tashakkurnomalar taqdim etildi.

Avvalroq davlat reyestriga “Samarqand noni”, “Samarqand no‘xatsho‘ragi” va “Samarqand qog‘ozi” kabi geografik ko‘rsatkichlar ham kiritilgan edi.

• Samarqand