Toshkent shahar byudjetining qo‘shimcha manbalarini xarajatlarga yo‘naltirish maqsadida 87 milliard so‘m ajratildi. Bu bo‘yicha Xalq deputatlari Toshkent shahar kengashi qarori qabul qilindi.

Qarorga ko‘ra, mahalliy byudjetdan jami 87 milliard so‘m ajratiladi. Mablag‘ning 65 milliard so‘mi ish haqi miqdori oshirilgani, shuningdek, elektr energiyasi tariflari ko‘tarilgani sababli mazkur xarajatlarga yo‘naltiriladi.

Shuningdek, 22 milliard so‘m quyidagi yo‘nalishlarga yo‘naltiriladi:

– “Ko‘cha san’ati va musiqasi” streat.uz platformasida faol ishtirok etgan ijodkorlarni moddiy rag‘batlantirish uchun — 24,7 million so‘m;

– 2025–2026-o‘quv yili uchun ijtimoiy ehtiyojmand oilalar vakillari, yetim yoki ota-onasining qaramog‘idan mahrum bo‘lgan talaba ayollarni moddiy qo‘llab-quvvatlash maqsadida 150 nafar talabaning kontrakt to‘lovi uchun — 1,4 milliard so‘m;

– Toshkent shahar kambag‘allikni qisqartirish va bandlik boshqarmasining yil yakunigacha elektr energiyasi sarfi uchun — 130 million so‘m;

– Shaxmat federatsiyasi shahar bo‘limiga mebel, texnika va jihozlar xaridi uchun — 400 million so‘m;

– Velosport federatsiyasi shahar bo‘limiga Damas avtomobili xaridi uchun — 100 million so‘m;

– Qon orqali yuqadigan kasalliklarning oldini olish maqsadida Cell Saver Elit “+” qon autotransfuziya uskunasini xarid qilish uchun — 750 million so‘m;

– Shayxontohur tumanidagi 169-maktab uchun Isuzu avtobusi xaridi — 770 million so‘m;

– Maktabgacha yoshdagi bolalarni qamrab olishni kengaytirish, faoliyati to‘xtab qolgan guruhlarni qayta tiklash, davlat bog‘chalarini ta’mirlash va jihozlash uchun — 10,5 milliard so‘m;

– “Toshkent tajribasi” loyihasi doirasida maktablarda qo‘shimcha fanlar bo‘yicha sinflarni ta’mirlash va dars o‘tuvchi o‘qituvchilarga ustama to‘lash uchun — 4 milliard so‘m;

– Bolalar uchun mo‘ljallangan kontentlar yaratishni qo‘llab-quvvatlash uchun — 1 milliard so‘m;

– Pedagoglar malakasini oshirish, har bir tumandan 5 nafardan jami 60 nafar matematika va tibbiy fan o‘qituvchisi hamda boshqarmadan 3 nafar xodimni xorijda o‘qitish xarajatlari uchun — 1,7 milliard so‘m;

– Toshkent shahar veterinariya va chorvachilikni rivojlantirish boshqarmasiga kommunal to‘lovlar uchun — 373 million so‘m;

– Toshkent shahar obodonlashtirish bosh boshqarmasi tomonidan Olmazor tumanidagi Forobiy ko‘chasida 7 650 kv.m yo‘lni asfalt bilan ta’mirlash uchun — 876 million so‘m.

Qarorda mablag‘larning maqsadli sarflanishini ta’minlash va nazorat qilish bo‘yicha mas’ul tashkilotlarga aniq topshiriqlar yuklatilgan.

Shu bilan birga, 518,1 mlrd so‘m vatan himoyachilari kuniga bag‘ishlab o‘tkazilgan asosiy bayram konsert dasturiga tayyorgarlik ko‘rish va uni o‘tkazish bilan bog‘liq xarajatlarga ajratilgan.

• Byudjet
• Toshkent