Litva poytaxti Vilnyusda chiqindilarni qayta ishlash bilan bog‘liq vaziyat keskinlashmoqda. Shaharda to‘planib qolgan chiqindilar hajmi ortib borayotgani sabab davlat darajasida favqulodda holat joriy etish masalasi ko‘rib chiqilmoqda.

Ma’lumotlarga ko‘ra, 2026-yil iyuliga kelib Vilnyusda qayta ishlanmagan chiqindilar hajmi 20 ming tonnadan oshgan. Chiqindilar omborlar, ochiq maydonlar va ularni olib chiqadigan yo‘llar bo‘ylarida to‘planib qolgan. Shaharning ayrim hududlarida yoqimsiz hid ham tarqalgan.

Muammo 2025-yil aprel oyida shahardagi asosiy chiqindilarni qayta ishlash zavodida yong‘in sodir bo‘lganidan keyin boshlangan. Zavod operatori — Energesman korxonasi faoliyatni tiklashga va’da bergan bo‘lsa-da, mablag‘ yetishmasligi sababli bu jarayon cho‘zilib ketgan.

Vilnyus mintaqasida har kuni qariyb 700 tonna chiqindi hosil bo‘lishi vaziyatni yanada murakkablashtirmoqda. Zavodning asosiy ombori to‘lib qolgani sabab chiqindilarni vaqtincha boshqa hududlarga olib chiqishga to‘g‘ri kelgan.

Aholining noroziligidan so‘ng mahalliy hokimiyat muammoni bartaraf etish choralarini kuchaytirgan. Jumladan, ayrim chiqindi to‘planadigan hududlarda tozalash ishlari kechasi amalga oshirilmoqda.

Shu bilan birga, may oyida Energesman kompaniyasi zavodni modernizatsiya qilish bo‘yicha 14 million yevrolik tenderda g‘olib chiqqan. Biroq mablag‘ kompaniyaning avvalgi qarzlarini qoplashga sarflanishi mumkinligidan xavotir bildirilib, dastlabki avans to‘lovlari bloklangan.

Natijada Vilnyusda chiqindilarni qayta ishlash infratuzilmasini tiklash va to‘planib qolgan chiqindilarni bartaraf etish masalasi dolzarb muammolardan biriga aylangan.