Toshkent metrosining “G‘afur G‘ulom” bekatida hayotiy ahamiyatga ega, noodatiy voqea yuz berdi — yo‘lovchi ayol bekat hududida farzandini dunyoga keltirdi. Bu haqda Toshkent metropoliteni matbuot xizmati yozmoqda.

Poyezdlarni kutib olish va jo‘natish bo‘yicha navbatchi xodima Naima Maxamadjonova voqea joyida chaqaloq tug‘ilayotgani haqida ichki ishlar xodimidan xabar olgan zahoti harakatga kirishgan.

U o‘ziga o‘rgatilgan tibbiy bilim va ko‘nikmalardan foydalangan holda ayolga birinchi yordam ko‘rsatgan, chaqaloqning kindigini bog‘lab, nafas olish refleksini faollashtirgan.

Tez yordam guruhi yetib kelguniga qadar, taxminan 10 daqiqa davomida, bekat xodimlari ona va chaqaloqning holatini nazorat ostida ushlab turgan.

Hozirda ona va chaqaloq sog‘lom, ular shifoxonaga yetkazilgan.

“Naima Maxamadjonova — fidoyilik va insonparvarlik namunasi. Uning ogohligi va tezkor harakati tufayli ona va farzandning hayoti xavfsiz ta’minlandi”, – deyiladi xabarda.

• Chaqaloq
• Metro
• Toshkent