AQSHda 2001-yil 11-sentyabr teraktlaridan keyin Nyu York aholisi Jahon savdo markazi hududidagi havo sifati bo‘yicha yetarlicha aniq ma’lumot olmagani haqidagi yangi hujjatlar e’lon qilindi. Ularda havo tarkibida sog‘liq uchun xavfli moddalar mavjud bo‘lgani qayd etilgan. Bu haqda The New York Times xabar berdi.

E’lon qilingan hujjatlarga ko‘ra, teraktlardan bir necha oy o‘tib ham Quyi Manxettenda asbest va boshqa zararli moddalar aniqlangan. 2002-yil iyulida, ya’ni hujumlardan qariyb 10 oy o‘tganidan keyin ham Jahon savdo markazidan 1,5 kilometrdan kamroq masofadagi Jon-strit binosida asbest izlari topilgan.

Ayrim namunalarda asbest miqdori ruxsat etilgan me’yorlardan yuqori bo‘lgan. Shuningdek, Jahon savdo markazi vayronalari yaqinida saraton kasalligini keltirib chiqarishi mumkin bo‘lgan benzolning yuqori konsentratsiyasi ham aniqlangan.

Biroq o‘sha paytdagi Nyu York meri Rudolf Juliani hamda keyinchalik shahar rahbari bo‘lgan Maykl Blumberg havo sifati aholi uchun xavfsiz ekanini bildirgan. Rasmiylar o‘tkazilgan tekshiruvlarda zararli moddalar miqdori ruxsat etilgan chegaralarda ekanini ta’kidlagan.

Yangi hujjatlarda esa ayrim hududlarda sog‘liq uchun xavf saqlanib qolgan bir paytda odamlarning Jahon savdo markazi atrofiga qaytishiga ruxsat berilgani ko‘rsatilgan.

Hujjatlar 9/11 Health Watch tashkilotining sud da’vosidan so‘ng ommaga taqdim etilgan. Tashkilot rahbari Ben Chevatning aytishicha, rasmiylar zaharli moddalar mavjudligidan xabardor bo‘lgan, biroq jamoatchilikka hududdagi havo xavfsizligi haqida boshqa ma’lumot berilgan.

Yangi ma’lumotlar 11-sentyabr teraktlari oqibatida sog‘lig‘i yomonlashgan jabrlanuvchilarga federal kompensatsiya olishda yordam berishi va yangi sud da’volariga asos bo‘lishi mumkin.

The New York Times ma’lumotlariga ko‘ra, keyingi yillarda 11-sentyabr hujumlari oqibatida yuzaga kelgan kasalliklar sabab vafot etganlar soni teraktlarning o‘zida halok bo‘lgan qariyb 3 ming kishidan ham oshgan bo‘lishi mumkin.

11-sentyabr voqealarining iqtisodiy oqibatlari ham katta bo‘lgan. Braun universitetining Costs of War loyihasi hisob-kitoblariga ko‘ra, teraktlarning bevosita iqtisodiy zarari 35–109 milliard dollarni tashkil etgan. Hujumlardan keyingi harbiy operatsiyalar va terrorizmga qarshi kurash bilan bog‘liq umumiy xarajatlar esa 2022-yilga kelib 5,8 trillion dollarga yetgan. Kelajakdagi davolanish va faxriylarni qo‘llab-quvvatlash xarajatlari ham hisobga olinsa, bu ko‘rsatkich qariyb 8 trillion dollarga baholangan.