“Hello Magar” Vengriya yangiliklar portalida “Markaziy Osiyo qanday qilib geografiyani kuchga aylantirmoqda” sarlavhasi ostida maqola e’lon qilindi. Ushbu maqolada qayd etilishicha, O‘zbekiston dengizga chiqish imkoniyati yo‘q davlat sifatida xalqaro savdo va iqtisodiy hamkorlikda yuksalishga erishish uchun samarali transport va logistika infratuzilmasini yaratishga katta ahamiyat bermoqda. Mamlakat geografik jihatdan tranzit nuqtasi sifatida Markaziy Osiyoni Xitoy, Janubiy Osiyo, Yevropa va Kavkaz bilan bog‘laydigan muhim ko‘prikka aylanish imkoniyatiga ega. Bu maqsadda “Xitoy – Qirg‘iziston – O‘zbekiston” va “O‘zbekiston – Afg‘oniston – Pokiston” kabi temir yo‘l loyihalari amalga oshirilmoqda. Ular yuk tashish vaqtlarini va xarajatlarini qisqartirish orqali mintaqaviy savdoni rag‘batlantiradi. 

Maqolada ta’kidlanishicha, transport izolyatsiyasi tufayli Markaziy Osiyo mamlakatlari jahon savdosida yetarli darajada ishtirok etilmayapti, eksport xarajatlari juda yuqori. Lekin O‘zbekistonda transport xarajatlarini kamaytirish, logistika jarayonlarini raqamlashtirish, zamonaviy texnologiyalarni joriy etish va elektron hujjatlar tizimini kengaytirish orqali bu holatga bosqichma-bosqich barham berilayotgani qayd etilgan. Shuningdek, O‘zbekistonda TIR (Transport Internatsional Router) va e-TIR kabi xalqaro standartlarga mos raqamli tashish tizimlari joriy etilgani, qo‘shni davlatlar bilan elektron hujjatlar almashinuvi yo‘lga qo‘yilgani transport sohasidagi islohotlarning muhim natijalari sifatida keltirilgan.

Keltirilgan taklif va xulosalar xalqaro hamkorlikni yanada mustahkamlashga qaratilgan bo‘lib, jumladan, BMT doirasida global raqamli transport hujjatlari standartlarini ishlab chiqish, konteynerli tashishni kengaytirish va raqamli savdo ekotizimini yaratish bo‘yicha tashabbuslar taklif etilgan. Shu bilan birga, logistika sohasida bilim va tajriba almashish platformalarini yaratish, raqamli savdo va transport sohasidagi innovatsiyalarni joriy etish orqali dengizga chiqishi yo‘q davlatlarning global iqtisodiyotdagi ishtirokini kengaytirish zarurligi ta’kidlangan.

• OAV
• Tranzit
• Vengriya
• maqola