Айни вақтга келиб, Ўзбекистонда Facebook’да 4,7 млн, Instagram’да 3,7 млн, Linkedln’да 288 минг, Telegram’да 18 млн, Odnoklassniki’да 16,7 млн, Twitter’да 51,6 минг va V-kontakte’да 2,6 млн фойдаланувчи мавжуд бўлиб, уларнинг кўпчилигини ёшлар ташкил этади.

“.uz” доменидаги веб-сайтларда, фуқароларнинг, шу жумладан ёшларнинг онги, руҳияти, маънавий-маърифий тарбиясига салбий таъсир кўрсатадиган, ахлоқсизлик, беҳаёлик, порнография, шафқацизлик, зўравонлик, қимор ҳамда таваккалчиликка асосланган ўйинлар тарғиботига хизмат қилиши мумкин бўлган материаллар ёки бошқа веб-ресурсларга ҳаволалар жойлаштириш (фойдаланувчилар томонидан) ҳолатлари кўп кузатилмоқда.

Қайд этилишича, 2021 йилнинг декабр ҳолатига кўра миллий домен ҳудудидаги 289 та веб-сайтда порнография, 91 та веб-сайтда эса беҳаёлик ва маънавий бузуқликка тарғиб қилувчи ҳолатлар аниқланган бўлиб, 2 097 та қонун бузилиши ҳолати қайд этилган.

Шунингдек, ижтимоий тармоқларнинг ўзбек сегментида маънавий бузуқликни тарғиб қилувчи 130 га яқин гуруҳ, саҳифа ва каналлар мавжудлиги аниқланган, уларда 2 646 та материал (фото, видео, матнли ва бошқалар) тарқатилган.

Бундан ташқари, маданият соҳасида кечаётган воқеалар бадиий филм, реклама (жумладан, кўчалардаги баннерлар), мусиқа ва клипларда фақат пул, бойлик тарғиботи мавжуд. Айрим ҳолларда миллий маънавиятга зид кўринишлар, саҳналар намойиш этилмоқда.

Ушбу ҳолатлар юзасидан кеча, 3 феврал куни ўтказилган Сенатнинг йигирма учинчи ялпи мажлисида сўз борди.

Шунингдек, Вазирлар Маҳкамасига жаҳон ахборот тармоғида ёшлар ва вояга етмаганлар учун миллий контентни ривожлантириш, уларнинг ижтимоий тармоқлардан фойдаланиш ҳамда зарарли ахборотдан ҳимоя қилиш тўғрисида парламент сўрови юбориш масаласи кўриб чиқилган.

• Порнография
• Сенат
• веб-сайт