Коррупцияга қарши чиқишлари билан танилган Эквадор президентлигига номзод Фернандо Вильявисенсио кеча, 9 август куни мамлакат пойтахти Китодаги сиёсий митингда отиб ўлдирилди.

Эквадорлик сиёсатчи ва мамлакат президентлигига номзод 59 ёшли Фернандо Вильявисенсио сайловолди митинги чоғида отиб ўлдирилган. Унинг хотини ва беш нафар фарзанди бор эди. Вильявисенсио мамлакатда коррупцияни йўқ қилишга ваъда берган. Бу чиқишлари ортидан эса, унга бир неча бор зўравонлик билан таҳдид қилинган.

Ҳозирда президентликка номзод Фернандо Вильявисенсио ўлдирилиши ортидан Эквадорда фавқулодда ҳолат эълон қилинди.

Воқеа гувоҳларининг сўзлари ва видеотасвирларга кўра, Вильявисенсио машинага ўтирганида унга қарата бир неча марта ўқ узилган. Гумонланувчи қўриқчилар билан отишмада ўлдирилган. Отишма оқибатида тўққиз киши жароҳатланган.

Отиб ўлдирилишидан олдин ўзининг сўнгги нутқида Вильявисенсио сайловчиларга мамлакатда коррупцияни йўқ қилишга ва ўғриларни қамоққа ташлашга ваъда берган.

Суиқасддан бир неча кун олдин, Вильявисенсио бир неча марта ўлим таҳдидларини олганини айтган, жумладан, таҳдидчилар орасида Эквадорда очиқ фаолият юритаётган кўплаб халқаро уюшган жиноий гуруҳлардан бири бўлган қудратли “Meksika Sinaloa” гиёҳванд моддаларнинг ноқонуний савдоси билан шуғулланувчи жиноий ташкилотининг раҳбарлари ҳам борлигини маълум қилганди.

Президент Гилермо Лассо содир бўлган воқеадан ғазабланганини ва ҳайратда эканлигини айтди. У бу жиноят жазосиз қолмаслигига ваъда берди.

"Сизни ишонтириб айтаманки, бу жиноят жазосиз қолмайди," - деди Лассо баёнотида.

Фернандо Вильявисенсионинг асл касби журналист бўлиб, у ўз фаолиятини “El Universo” газетасидан бошлаган. У 2013 йилда сиёсатга кириб келган. У 2017 йилдан қонун чиқарувчи орган 2023 йил 17 майда тарқатиб юборилгунга қадар Миллий Ассамблея аъзоси бўлган.

Июль ойида ўтказилган сайловолди сўровига кўра, Фернандо Вильявисенсио 13,2 фоиз овоз тўплаган. У бу натижа билан “Фуқаролик инқилоби учун ҳаракат” партияси номзоди, сўл марказчи сиёсатчи Луиса Гонзалез билан бирга 26,6 фоиз овоз тўплаган ҳолда иккинчи босқичга чиқиши мумкин эди. Учинчи ўринда 12,5 фоиз овоз билан маҳаллий халқлар ҳуқуқлари учун курашувчи Яку Перез жой олган.

• Эквадор
• Президент
• Қотиллик
• суиқасд