Ғазо секторида озиқ-овқат юкларини олиб кетаётган гуманитар юк машинасининг ағдарилиб кетиши оқибатида 20 фаластинлик ҳалок бўлди. Бу ҳақда “Anadolu” хабар берди.

Маълум бўлишича, Исроил армияси инсонпарварлик ёрдамига киришни чеклашда давом этмоқда ва бу билан инсонпарварлик инқирозини янада кучайтирмоқда. Хусусан, Исроил қасддан чекланган миқдордаги ёрдам юк машиналарини очликдан азоб чекаётган фаластинликлар тўпланиб қолган ҳудудларга жўнатиб, уларни хавф остига қўйгани айтилмоқда.

“Исроил ишғолининг босими остида, атайлаб яратилган тартибсизлик шароитида Дайр ал-Балаҳ ҳудудида, илгари бомбаланган ва ўтиш қийин бўлган йўл бўйлаб гуманитар юк машинаси жўнатилди. Автомашина озиқ-овқат олишга уринаётган фаластинликлар устига ағдарилиб кетди. Фожиа оқибатида 20 киши ҳалок бўлди, ўнлаб кишилар жароҳат олди”, – дейилган Ғазо ҳукумати баёнотида.

Ғазо маъмуриятининг таъкидлашича, Исроил “оммавий очарчилик жиноятини содир этиш” орқали 2,1 миллион кишининг ҳаётини хавф остига қўйган ва озиқ-овқат, дори-дармон ва зарурий буюмлар етказиб беришга тўсқинлик қилишда давом этмоқда. Халқаро ҳамжамият “барча қизил чизиқларни кесиб ўтган” инсонийлик фалокатининг кучайиши фонида “жиноий сукунат”ни сақлаб қолаётгани алоҳида таъкидланди. Ғазо ҳукумати БМТ ва халқаро инсон ҳуқуқлари ташкилотларини Исроил жиноятларини тўхтатиш, гуманитар ёрдамнинг тўсиқсиз ва сўзсиз киришини таъминлаш, барқарор ва хавфсиз асосда чегара ўтиш жойларини очиш учун зудлик билан аралашишга чақирди.

Шунингдек, маҳаллий ҳокимият сукут сақлаш ёки содир бўлаётган воқеаларни эътиборсиз қолдириш Исроил содир этилган жиноятларга бевосита шериклик эканлигини таъкидлаган.

• Фаластин
• Гуманитар ёрдам
• Halokat
• Isroil
• yuk mashinasi