Тошкент шаҳар ҳокимлиги ҳузуридаги Жамоатчилик кенгаши Вазирлар Маҳкамасидан Олий Мажлис Қонунчилик палатаси биноси яқинида Миллий драма театри қурилишини экологик экспертизадан ўтказишни сўраб, мурожаат йўллади.

“Оммавий ахборот воситаларида 2021 йилнинг ноябрида Олий Мажлис қонунчилик палатаси ёнида жойлашган Миллий боғ ҳудудидаги кўл қуритилиб, ўрнида Миллий драма театри қурилиши борасида хабарлар тарқалди. Тошкент шаҳар ҳокимлиги ҳузуридаги Жамоатчилик кенгаши Миллий боғдаги кўл ўрнида Миллий академик драма театри янги биносини қуриш режасидан ўз хавотирини билдиради. 

Маълум бўлишича, лойиҳа қонунчиликда ўрнатилган тартибда экологик экспертизадан ўтказилмасдан амалга оширилиши режалаштирилган. Юқоридагиларга асосланиб, бу масалани экологик экспертиза хулосаларини инобатга олган ҳолда ҳал қилиниши мақсадга мувофиқ бўлар эди”, – дейилади Вазирлар Маҳкамаси ва Тошкент шаҳар ҳокимлигига йўлланган мурожаатда.

Аввалроқ, Миллий боғ ҳудудида Навоий номидаги ижод мактаби ва адабиёт музейининг янги биноси қурилиши бошланган. 

Бундан ташқари янги Миллий драма театр биноси, машҳур япониялик архитектор Тадао Андо лойиҳаси асосида Давлат санъат музейининг намойишлари комплекси, ёш олимлар, ёшлар ва китоб ихлосмандларига хизмат кўрсатишга мўлжалланган, илм-фан ва санъатнинг турли соҳаларига оид босма ҳамда электрон даврий нашрларнинг улкан салоҳиятига эга бўлган, шунингдек, 1,5 млн дона китоблар фондини ўз ичига олган улкан кутубхона биноси қурилиши режалаштирилган.

• миллий боғ
• Сенат