“Netflix” YouTube каналида ёзувчи Жонатан Строуднинг “Локвуд жамоаси” романига асосланган ва шу номдаги илмий-фантастик сериалнинг дастлабки трейлери тақдим этилди.

Сюжетга кўра, Лондондаги энг иқтидорли ўсмирлар ҳар кеча бутун шаҳарни эгаллаб олган даҳшатли арвоҳлар билан жанг қилишади. Катта инспекторлар ишлайдиган йирик агентликлар орасида битта мустақил муассаса мавжуд: “Локвуд жамоаси”. Уни учта ўсмир – Энтони Локвуд, Жорж Карим ва Льюси Карлайл бошқаради. Улар биргаликда тарих йўналишини ўзгартирадиган сирни очадилар. Сериалдаги даҳшатли арвоҳлар, детектив ҳикоя ва жасур ўсмирлар – барчаси замон руҳида.

Лойиҳанинг асосчиси ва бош режиссёри Жо Корниш бўлиб, у “Тинтиннинг саргузаштлари: Ягона шохчалар сири” фильми орқали машҳурликка эришган. Хабарларга кўра, Сериал 27 январь куни эфирга узатилиши режалаштирилган.

2020 йил 19 май куни Эдгар Райт ва Найра Паркнинг янги продюсерлик компанияси “Complete Fiction Netflix” ҳамда Жонатан Строуднинг “Локвуд жамоаси” илмий-фантастик романлар сериясига асосланган саккиз эпизодли сериални суратга олиш устида ишлаётгани эълон қилинди. Британиялик Жо Корниш сериал режиссёри, ижрочи продюсери, шунингдек, сценарий муаллифи ва бош режиссёр этиб тайинланди.

Илк бор 2022 йил 26 октябрда ижтимоий тармоқларда сериалдан парча эълон қилинди, унинг сўнггида лойиҳа премьераси (2023 йил 27 январь) кўрсатилган эди.

Сериалда бош ролларни Руби Стокес, Кемерон Чапман ва Али Ҳожи-Хешмати ижро этган. 2022 йил март ойида лойиҳанинг актёрлар таркиби тасдиқланган эди.

Суратга олиш ишлари 2021 йил 5 июль куни Лондон шаҳрида бошланган. 2021 йил октябрь ойи охирида эса жараён “Кенсал Грин” қабристонига кўчган. 2022 йил 15 мартда Жо Корниш суратга олиш ишлари якунлангани ва пост-продюсерлик бошланганини эълон қилди.

• Буюк Британия
• Кино
• Netflix
• Сериал