Владимир Путин бу ҳақда МДҲ давлатлари раҳбарларининг норасмий саммити доирасида Тожикистон президенти Эмомали Раҳмон билан алоҳида учрашувда маълум қилди.

“Икки томонлама учрашувимизни сизга ва бир неча кун олдин ҳалок бўлган тожикистонлик боланинг оила аъзоларига самимий ҳамдардлик сўзлари билан бошламоқчиман. Болаларга нисбатан теракт содир этилиши – жирканч жиноятдир. Шак-шубҳасиз, тергов охирига етказилади ва айбдорлар, агар улар бир неча киши бўлса, албатта, тўлиқ жазога тортилади. Яна бир бор такрорлайман: бу жиноят мени даҳшатга солди”, — деди Путин.

16 декабрь куни тўққизинчи синф ўқувчиси Тимофей К. Москва вилоятининг Горки-2 аҳоли пунктидаги ўзи ўқийдиган мактабга пичоқ кўтариб борган ва ўқувчиларга ҳужум қилган. У мактаб қўриқчисини яралаган ва 10 ёшли Қобилжон Алиевни ўлдирган. Тимофей К. ўзи томонидан олинган видеода ўқувчилардан қайси миллатдан эканини сўрагани акс этган. Унинг эгнида оммавий қотилликларга ишора қилувчи ёзувлар акс этган экипировка бўлган. Тимофейга нисбатан қотиллик ва суиқасд бўйича айбловлар қўйилган. Суд уни икки ой муддатга ҳибсга олган.

• Эмомали Раҳмон
• Ҳамдардлик
• Президент
• Путин
• Россия
• Тожикистон