Сўнгги юз йил ичида бутун дунё бўйлаб қўл меҳнати сони камайди. Кўпчилик офисда ўтирган ҳолатда фаолият олиб боради. Дам олиш кунларида эса  одамлар компьютер экрани ёки телевизор олдида “занжирбанд” бўлмоқда. Натижада кам ҳаракатлилик оддий ҳолга айланиб қолмоқда десак мулобалаға бўлмайди.

Жисмоний фаоллик бўйича ЖССТ тавсияларига амал қилмайдиган, яъни ҳафтасига 150 дақиқадан кам ўртача ёки 75 дақиқа интенсив аэробик фаолиятга эга бўлган одамни ҳаракатсиз одам деб аташ мумкин. Инсон ётганда ёки ўтирганда, масалан, компьютерда, машина ҳайдашда ёки телевизор қаршисида бўлганда пассив ҳисобланади.

Одам ўтиришга қанча вақт сарфласа, соғлиқ муаммолари хавфи шунчалик юқори бўлади, шунинг учун ЖССТ пассив вақтни қисқартириш, тез-тез туриш ва ҳаракатланишни тавсия қилади.

Агар сиз узоқ вақт ўтирсангиз, юрак-қон томир тизими заифлашади ва тегишли касалликлар хавфи ортади. Мушак-скелет тизими ҳам ўтиришдан азият чекади, чунки асосий мушакларнинг баъзилари тўғри ишламайди ҳамда умуртқа поғонасининг ҳолати ўзгаради, бу ҳеч бўлмаганда бел оғриғига олиб келиши мумкин. Бундан ташқари, узоқ вақт ўтириш остеопороз хавфини оширади.

Пассив дам олиш тананинг бошқа тизимларига ҳам таъсир қилади – масалан, сурункали яллиғланишнинг ривожланишига ёрдам беради ва жинсий гормонлар ишини бузади. Бундан ташқари, узоқ вақт ўтириш метаболизмни ўзгартиради ва пассивлик, ёмон кайфият, когнитив пасайиш ҳамда депрессия билан боғлиқ.

Технология оламида айнан инсонларни иш жараёнида ҳам кўпроқ энергия сарф қилиши ва соғлом бўлишини таъминлаш мақсадида тик туриб ишлаш имконини берувчи иш столини бозорга чиқарганига бир неча йиллар бўлди.

Тик турганда инсон кўп энергия сарф қилиш имконига эга бўлади. Сиз бу столдан фойдаланган бўлармидингиз?

• Гимнастика
• Иш стажи
• саломатлик