Xitoy Xalq-ozodlik armiyasi gumanoid robotlarni jangovar sharoitlarda qo‘llashga tayyorlashni boshladi. Bu haqda Reuters xabar berdi.

Nashr ma’lumotlariga ko‘ra, Xitoy gumanoid robotlarni ishlab chiqish va ishlab chiqarish bo‘yicha dunyodagi yetakchi davlatlardan biriga aylangan. AQSHning baholashlariga ko‘ra, 2025-yilda dunyo bo‘yicha gumanoid robotlar eksportining 95 foizi Xitoy hissasiga to‘g‘ri kelgan.

Xitoy harbiy muassasalari so‘nggi yillarda gumanoid robotlardan harbiy amaliyotlarda foydalanish imkoniyatlarini o‘rganmoqda. Shuningdek, robotlar va ularni o‘qitish texnologiyalari xarid qilinib, ularning harbiy xizmatchilar bilan birgalikda ishlashi sinovdan o‘tkazilmoqda.

Reuters 2025–2026-yillarga oid harbiy xaridlar, ilmiy tadqiqotlar, patentlar, rasmiy xabarlar hamda hukumat va mudofaa kompaniyalari hujjatlariga oid 100 dan ortiq e’lonni tahlil qilgan. Ushbu ma’lumotlar Xitoyda robotlarning atrof-muhitni anglash, turli obyektlarni boshqarish va sun’iy intellekt yordamida o‘qitish imkoniyatlariga katta e’tibor qaratilayotganini ko‘rsatadi.

Hozircha jangovar robotlar Xitoy armiyasining amaldagi bo‘linmalariga keng miqyosda yetkazib berilgani haqida ma’lumot yo‘q. Biroq ularni, ayniqsa, shaharlardagi janglarda qo‘llash konsepsiyalari ishlab chiqilmoqda.

Milliy mudofaa texnologiyalari universitetining 2025-yildagi tadqiqotida shturm guruhlari tarkibi va harakatlari modellashtirilgan. Unga ko‘ra, har bir guruhga oltitagacha jangovar robot — jumladan, gumanoid robotlar, robot-itlar va uchuvchisiz qurilmalar biriktirilishi mumkin. Ular harbiy xizmatchilar bilan birgalikda dushman egallagan binolarni xona va qavatma-qavat tozalash kabi vazifalarni bajarishi ko‘zda tutilgan.

Karnegi-Mellon universiteti professori Aaron Jonsonning ta’kidlashicha, jangovar sharoit robotlar uchun kutilmagan va murakkab vaziyatlarni yuzaga keltirishi mumkin.

Los-Anjelesdagi Kaliforniya universiteti professori Dennis Xon esa robotlardan inson harbiylarini yuborish xavfli bo‘lgan hududlarda foydalanish ularni ishlab chiqishning asosiy sabablaridan biri ekanini qayd etdi.

Shu tariqa, Xitoy armiyasida gumanoid robotlarning harbiy maqsadlarda qo‘llanishi hozircha tajriba va tadqiqot bosqichida bo‘lsa-da, Pekin ushbu texnologiyani kelajakdagi jangovar amaliyotlarning bir qismiga aylantirish imkoniyatlarini faol o‘rganmoqda.