“Lanset” laboratoriyasi keng ko‘lamli tadqiqotni e’lon qildi, uning mualliflari spirtli ichimliklarni iste’mol qilishning sog‘liq uchun foyda yoki zararlari to‘g‘risidagi hisobotlar qanchalik haqiqatga yaqin ekanligini sinab ko‘rishga qaror qilishdi. 2020 yilgi Global kasallik yuki so‘rovi statistik ma’lumotlaridan foydalanib, ular 204 mamlakat va hududlarda 15 va undan katta yoshdagi odamlarning spirtli ichimliklarni iste’mol qilish darajasini aniqlashga muvaffaq bo‘lishdi.

Shu tariqa olimlar 2020 yilda 1,34 milliard odam xavfli miqdorda spirtli ichimliklar iste’mol qilishini qayd etishdi. Ularning 76,7 foizi erkaklar bo‘lib, 59,1 foizi 40 yoshgacha bo‘lganlar hisoblanadi.

Spirtli ichimliklarni iste’mol qilish bilan bog‘liq xavf erkaklar va ayollar uchun bir xil bo‘lsa-da, 15 yoshdan 39 yoshgacha bo‘lgan erkaklar spirtli ichimliklardan eng yuqori xavf ostida bo‘ladi. Chunki ular ko‘proq va nisbatan tezroq ichishadi, bu ularning sog‘lig‘iga salbiy ta’sir qiladi. Shuningdek, ushbu yoshdagi “guruh” vakillari yo‘l-transport hodisalari qurbonlarining 60 foizini tashkil qiladi.

Olimlar standart ichimliklarda alkogolning dozasini o‘lchab ko‘rishdi. Bir stakan (eng kamida 30 ml) aroq tarkibida 40 foiz, 100 ml sharob tarkibida 13 foiz yoki 375 ml pivo tarkibida 5 foizgacha alkogol mavjud. Tahlillarga ko‘ra, 40 yoshgacha bo‘lgan erkaklar uchun xavfsiz doza kuniga atigi 0,136 stakanni tashkil qiladi va bu chegaradan oshib ketganda sog‘likka jiddiy zarar yetishi ehtimoli yuqori. Xuddi shu yoshdagi ayollar esa taxminan ikki barobar ko‘proqni tashkil etadi.

40-64 yoshdagi odamlar uchun esa tavsiya qilingan miqdor kuniga 0,5 dan 1,81 stakangacha. Ammo 65 yoshdan oshgan odamlar spirtli ichimliklarni sog‘lig‘iga salbiy ta’sir ko‘rsatmasligi haqida aniq tibbiy ko‘rsatmaga ega bo‘lsagina, kuniga 3,5 stakan iste’mol qilishlari mumkin ekan.

Shu bilan birga, spirtli ichimliklarni o‘rtacha darajada iste’mol qilish jiddiy sog‘liq muammolari bo‘lmagan 40 yoshdan oshgan odamlarda yurak xastaligi, insult va diabet xavfini kamaytirishi qayd etilgan.

• Alkogol
• Olimlar
• Spirt
• salomatlik